月娘你敢有聽著
《月娘你敢有聽著》Gue̍h-niû Lí Kám Ū Thiann–tio̍h
王茉聿Ông Bua̍t-u̍t
——————————————
風吹樹影
hong tshue tshiū-iánn
搖啊搖
iô–ah iô
月娘佇天頂微微仔笑
gue̍h-niû tī thinn-tíng bî-bî-á tshiò
回憶入夢
huê-ik ji̍p bāng
望啊望
bāng–ah bāng
你敢會笑我是戇人
lí kám ē tshiò guá sī gōng-lâng
行過舊厝的巷仔
kiânn kuè kū-tshù ê hāng-á
鼻著熟似的芳味
phīnn-tio̍h si̍k-sāi ê phang-bī
較早的笑聲袂來消失
khah-tsá ê tshiò-siann buē lâi siau-sit
這心事欲對佗藏
tse sim-sū beh tuì toh tshàng
綴時間沓沓仔來放
tuè sî-kan ta̍uh-ta̍uh-á lâi pàng
寂寞的影
tsi̍k-bo̍k ê iánn
藏佇咧空縫
tshàng tī-leh khang-phāng
月娘請聽阮講
gue̍h-niû tshiánn thiann gún kóng
青春的寄望
tshing-tshun ê kià-bāng
猶咧流浪
iáu teh liû-lōng
繁華敢攏是夢
huân-huâ kám lóng-sī bāng
來想起過往
lâi siūnn-khí kuè-óng
彼時揣無的路
hit-sî tshuē-bô ê lōo
一時懵懂
tsi̍t-sî bóng-tóng
月娘請聽阮講
gue̍h-niû tshiánn thiann gún kóng
簡單過日子
kán-tan kuè ji̍t-tsí
是我的願望
sī guá ê guān-bōng
毋免閣驚風霜
m̄-bián koh kiann hong-song
有人來照顧
ū-lâng lâi tsiàu-kòo
你敢有聽著
lí kám ū thiann–tio̍h
