好名聲
《好名聲》Hó Miâ-siann
玟靈Bûn-lîng
——————————————
一人一款命
tsi̍t-lâng tsi̍t-khuán miā
有好額嘛有散赤
ū hó-gia̍h mā ū sàn-tshiah
為著拚生活
uī-tio̍h piànn sing-ua̍h
一滴血一滴汗
tsi̍t-tih hueh tsi̍t-tih kuānn
靠天來賺食
khò thinn lâi tsuán-tsia̍h
抑是看別人心情
ia̍h-sī khuànn pa̍t-lâng sim-tsiânn
好䆀攏是愛照步行
hó-bái lóng-sī ài tsiàu-pōo kiânn
人生這條路
jîn-sing tsit tiâu lōo
就算坎坷也愛拚
tiō-sǹg khám-khia̍t iā ài piànn
毋驚寒抑熱
m̄-kiann kuânn ia̍h jua̍h
抑是風雨偌大
ia̍h-sī hong-hōo guā tuā
做人的委屈
tsuè-lâng ê uí-khut
永遠藏咧心肝
íng-uán tshàng teh sim-kuann
恬恬一步一步
tiām-tiām tsi̍t-pōo-tsi̍t-pōo
拚予人看
piànn hōo-lâng khuànn
有誰會記我的名
ū siáng ē-kì guá ê miâ
雖然這馬無人知影
sui-jiân tsit-má bô-lâng tsai-iánn
每一个成功的英雄
muí tsi̍t-ê sîng-kong ê ing-hiông
攏捌做過小卒仔
lóng bat tsuè kuè sió-tsut-á
有誰聽見我的聲
ū siáng thiann-kìnn guá ê siann
雖然這馬無人來聽
sui-jiân tsit-má bô-lâng lâi thiann
相信總會有一工
siong-sìn tsóng ē ū-tsi̍t-kang
我會拚出好名聲
guá ē piànn tshut hó miâ-siann
