中央公園鴨咪仔的故事
《中央公園鴨咪仔的故事》Tiong-iong-kong-hn̂g Ah-bî-á ê Kòo-sū
林宜誠Lîm Gî-sîng
詹喆君Tsiam Tiat-kun
——————————————
公園內湖中島
kong-hn̂g-lāi ôo-tiong tó
一隻白色的鴨母
tsi̍t-tsiah pe̍h-sik ê ah-bú
孵出一窩鴨咪仔
pū tshut tsi̍t-o ah-bî-á
鴨咪仔真可愛
ah-bî-á tsin khó-ài
一隻一隻會曉排隊
tsi̍t-tsiah-tsi̍t-tsiah ē-hiáu pâi-tuī
綴佇鴨母後壁
tuè tī ah-bú āu-piah
泅來泅去
siû-lâi-siû-khì
鴨母用前後擺動
ah-bú iōng tsîng-āu pái-tāng
來指揮
lâi tsí-hui
看起來有夠古錐
khuànn–khí-lâi ū-kàu kóo-tsui
有一个查某人
ū tsi̍t-ê tsa-bóo-lâng
每工帶著切好的青菜
muí-kang tuà tio̍h tshiat-hó ê tshinn-tshài
來飼鴨咪仔
lâi tshī ah-bî-á
微微微
bi̋ bi̋ bi̋
微微微
bi̋ bi̋ bi̋
聽著查某人
thiann-tio̍h tsa-bóo-lâng
熟似親切的叫聲
si̍k-sāi tshin-tshiat ê kiò siann
鴨母帶著鴨咪仔
ah-bú tuà tio̍h ah-bî-á
按對岸泅過來
àn tuì-huānn siû–kuè-lâi
放心來食菜
hòng-sim lâi tsia̍h tshài
若有鴨公來搶食
nā ū ah-kang lâi tshiúnn tsia̍h
鴨母佇邊仔共警戒
ah-bú tī pinn–á kā kíng-kài
予人感動
hōo-lâng kám-tōng
母愛的偉大
bú-ài ê uí-tāi
有一个老阿公
ū tsi̍t-ê lāu-a-kong
每工帶著伊的乖孫
muí-kang tuà tio̍h i ê kuai-sun
來看鴨咪仔
lâi khuànn ah-bî-á
一兩三四五六
tsi̍t nn̄g sann sì gōo la̍k
阿公叫乖孫
a-kong kiò kuai-sun
算看鴨咪仔有幾隻
sǹg khuànn ah-bî-á ū kuí-tsiah
有一工乖孫問阿公
ū tsi̍t-kang kuai-sun mn̄g a-kong
為啥物鴨母的毛是白的
uī-siánn-mih ah-bú ê mn̂g sī pe̍h–ê
但是鴨咪仔的毛是烏的呢
tān-sī ah-bî-á ê mn̂g sī oo–ê neh
阿公共乖孫解說
a-kong kā kuai-sun kái-sueh
鴨母是白的
ah-bú sī pe̍h–ê
猶毋過鴨公是烏的
iáu-m̄-koh ah-kang sī oo–ê
相濫的結果
sio-lām ê kiat-kó
鴨咪仔是一半烏
ah-bî-á sī tsi̍t-puànn oo
一半白的囉
tsi̍t-puànn pe̍h–ê looh
哈哈哈
hah hah hah
日子一工一工過
ji̍t-tsí tsi̍t-kang tsi̍t-kang kuè
聽講有一隻老鴨母
thiann-kóng ū tsi̍t-tsiah lāu ah-bú
閣再咧孵卵
koh-tsài teh pū-nn̄g
半暝有一隻野狗出現
puànn-mî ū tsi̍t-tsiah iá-káu tshut-hiān
鴨母為著保護鴨卵
ah-bú uī-tio̍h pó-hōo ah-nn̄g
毋願離開
m̄-guān lī-khui
煞予野狗來咬死
suah hōo iá-káu lâi kā–sí
遐的卵
hia-ê nn̄g
有人提轉去煮
ū-lâng the̍h tńg-khì tsú
聽講卵內底
thiann-kóng nn̄g lāi-té
已經有鴨仔囝的形
í-king ū ah-á-kiánn ê hîng
這款的代誌
tsit khuán ê tāi-tsì
毋知傷著偌濟人的心
m̄-tsai siong-tio̍h guā-tsē lâng ê sim
這款的代誌
tsit khuán ê tāi-tsì
毋知傷著偌濟人的心
m̄-tsai siong-tio̍h guā-tsē lâng ê sim
啊~ah~
鴨咪仔予人數念
ah-bî-á hōo-lâng siàu-liām
得人的疼
tit lâng ê thiànn
鴨咪仔
ah-bî-á
予人快樂
hōo-lâng khuài-lo̍k
予人希望
hōo-lâng hi-bāng
朋友啊
pîng-iú–ah
有閒著來中央公園
ū-îng tio̍h lâi Tiong-iong-kong-hn̂g
看鴨咪仔
khuànn ah-bî-á
順紲予鴨咪仔看看咧
sūn-suà hōo ah-bî-á khuànn-khuànn–leh
