顧身體較贏顧家伙
《顧身體較贏顧家伙》Kòo Sin-thé Khah Iânn Kòo Ke-hué
七郎Tshit-lông
——————————————
一冬一冬人會老
tsi̍t-tang-tsi̍t-tang lâng ē lāu
青春青春袂當留
tshing-tshun tshing-tshun buē-tàng lâu
少年的時陣
siàu-liân ê sî-tsūn
講咱有偌𠢕
kóng lán ū guā gâu
一切辛苦
it-tshè sin-khóo
囥咧心肝頭
khǹg teh sim-kuann-thâu
人的身軀
lâng ê sin-khu
毋是鐵來拍
m̄-sī thih lâi phah
有時嘛愛保養
ū-sî mā ài pó-ióng
唱歌跳舞
tshiùnn-kua thiàu-bú
五臟六腑會用較久
ngóo-tsōng lio̍k-hú ē īng khah kú
一世人為錢賭性命
tsi̍t-sì-lâng uī tsînn tóo sìnn-miā
身苦病疼
sin-khóo pīnn-thiànn
你敢攏毋驚
lí kám lóng m̄-kiann
閒閒散步四界行
îng-îng sàn-pōo sì-kuè kiânn
顧身體較贏顧家伙
kòo sin-thé khah iânn kòo ke-hué
