日頭雨
《日頭雨》Ji̍t-thâu-hōo
吳美琳Ngôo Bí-lîm
——————————————
淋著這陣日頭雨
lâm tio̍h tsit-tsūn ji̍t-thâu-hōo
咱有仝款的溫度
lán ū kāng-khuán ê un-tōo
你會共我疼
lí ē kā guá thiànn
我會共你惜
guá ē kā lí sioh
毋驚日頭毋驚雨
m̄-kiann ji̍t-thâu m̄-kiann hōo
干焦驚咱傷幸福
kan-na kiann lán siunn hīng-hok
自彼日
tsū hit-ji̍t
看見你的笑容
khuànn-kìnn lí ê tshiò-iông
毋知家己哪會遮反常
m̄-tsai ka-kī ná ē tsiah huán-siông
有時陣戇戇
ū-sî-tsūn gōng-gōng
有時陣悾悾
ū-sî-tsūn khong-khong
有時陣
ū-sî-tsūn
頭殼敢若揣無路
thâu-khak kánn-ná tshuē-bô lōo
兩人順著牆圍來散步
nn̄g-lâng sūn-tio̍h tshiûnn-uî lâi sàn-pōo
雄雄落著一陣日頭雨
hiông-hiông lo̍h tio̍h tsi̍t-tsūn ji̍t-thâu-hōo
淡薄仔冰冰
tām-po̍h-á ping-ping
淡薄仔燒燒
tām-po̍h-á sio-sio
淡薄仔藏佇心內的愛慕
tām-po̍h-á tshàng tī sim-lāi ê ài-bōo
牽手一步閣一步
khan-tshiú tsi̍t-pōo koh tsi̍t-pōo
記持一幕閣一幕
kì-tî tsi̍t-bōo koh tsi̍t-bōo
若有話
nā ū uē
著緊講
tio̍h kín kóng
想欲愛
siūnn-beh ài
著緊討
tio̍h kín thó
咱互相倚靠袂寂寞
lán hōo-siong uá-khò buē tsi̍k-bo̍k
管伊好天抑落雨
kuán i hó-thinn ia̍h lo̍h-hōo
管伊是冰抑是燒
kuán i sī ping ia̍h-sī sio
我會陪你行
guá ē puê lí kiânn
你會陪我講
lí ē puê guá kóng
上簡單平凡的快樂
siōng kán-tan pîng-huân ê khuài-lo̍k
—
淋著這陣日頭雨
lâm tio̍h tsit-tsūn ji̍t-thâu-hōo
咱有仝款的溫度
lán ū kāng-khuán ê un-tōo
你會共我疼
lí ē kā guá thiànn
我會共你惜
guá ē kā lí sioh
毋驚日頭毋驚雨
m̄-kiann ji̍t-thâu m̄-kiann hōo
干焦驚咱傷幸福
kan-na kiann lán siunn hīng-hok
上驚咱會傷幸福
siōng kiann lán ē siunn hīng-hok
天攏為咱來祝福
thinn lóng uī lán lâi tsiok-hok
歹勢予人會怨妒
pháinn-sè hōo-lâng ē uàn-tòo
