初戀的暗暝
《初戀的暗暝》Tshoo-luân ê Àm-mî
石喬Tsio̍h-kiâu(石橋Tsio̍h-kiô)
——————————————
初戀的咱兩人
tshoo-luân ê lán nn̄g-lâng
快樂心輕鬆
khuài-lo̍k sim khin-sang
踮在公園橋邊
tiàm-tsāi kong-hn̂g kiô-pinn
談情快樂時
tâm-tsîng khuài-lo̍k sî
向著月娘講起
hiòng tio̍h ge̍h-niû kóng-khí
你我將來幸福的代誌
lí guá tsiong-lâi hīng-hok ê tāi-tsì
愛情會得結連理
ài-tsîng ē-tit kiat-liân-lí
我一定踮你身邊
guá it-tīng tiàm lí sin-pinn
伴著你過日子
phuānn tio̍h lí kè ji̍t-tsí
永遠毋分離
íng-uán m̄-hun-lî
十五暝月當圓
tsa̍p-gōo-mî ge̍h tng înn
四邊風景媠
sì-pinn hong-kíng suí
美麗樹欉花蕊
bí-lē tshiū-tsâng hue-luí
送出好芳味
sàng-tshut hó phang-bī
阮是多情男兒
gún sī to-tsîng lâm-jî
你是美麗溫柔的女兒
lí sī bí-lē un-jiû ê lú-jî
心心相印情難移
sim-sim siong-ìn tsîng lân-î
親像著月娘伴星
tshin-tshiūnn tio̍h ge̍h-niû phuānn tshinn
心愛的心歡喜
sim-ài–ê sim huann-hí
永遠毋分離
íng-uán m̄-hun-lî
暗風吹柳葉枝
àm-hong tshue liú-hio̍h-ki
月色照溪墘
gue̍h-sik tsiò khue-kînn
雙人相依相隨
siang-lâng siong-i siong-suî
立誓毋分離
li̍p-sè m̄-hun-lî
毋驚環境阻礙
m̄-kiann huân-kíng tsóo-gāi
天涯海角阮也欲愛伊
thian-gâi hái-kak gún iā beh ài i
祈禱月娘來保庇
kî-tó ge̍h-niû lâi pó-pì
好美夢毋通拍碎
hó bí-bāng m̄-thang phah-tshuì
心愛的只有你
sim-ài–ê tsí-ū lí
永遠毋分離
íng-uán m̄-hun-lî
