桂花
《桂花》Kuì-hue
李愛綺Lí Ài-khí(李嘉Lí Ka)
——————————————
人人叫我桂花名
lâng-lâng kiò guá kuì-hue miâ
毋知好聽
m̄-tsai hó-thiann
抑是無人聽
ia̍h-sī bô-lâng thiann
桂花桂花啊
kuì-hue kuì-hue–ah
落塗不再回
lo̍h-thôo put-tsài huê
像阮一生的怨慼
tshiūnn gún it-sing ê uàn-tsheh
阮這款女人真濟
gún tsit khuán lú-jîn tsin tsē
幸福嘛毋捌相揣
hīng-hok mā m̄-bat sio-tshuē
雖然這是命
sui-jiân tse sī miā
毋願金金看
m̄-guān kim-kim khuànn
自己的命運受拖磨
tsū-kí ê miā-ūn siū thua-buâ
阮的青春夢
gún ê tshing-tshun-bāng
親像酒一杯
tshin-tshiūnn tsiú tsi̍t-pue
苦苦啉落腹肚底
khóo-khóo lim-lo̍h pak-tóo-té
