年節調
《年節調》Nî-tseh-tiāu
丁麗燕Ting Lē-iàn
——————————————
新年頭舊年尾
sin-nî thâu kū-nî bué
快樂正月初
khuài-lo̍k tsiann-gue̍h tshe
歡喜加一歲喔
huann-hí ke tsi̍t-huè–ooh
家家戶戶炊甜粿
ke-ke-hōo-hōo tshue tinn-kué
都食半個月
to tsia̍h puànn kò-gue̍h
過半月元宵節
kuè puànn-gue̍h Guân-siau-tseh
人人攑燈火
lâng-lâng gia̍h ting-hué
出去遊夜街
tshut-khì iû iā-ke
阮是單獨厝內坐
gún sī tan-to̍k tshù-lāi tsē
愛食麻油雞喔
ài tsia̍h muâ-iû-ke–ooh
五月初端午節
gōo-gue̍h tshe Tuan-ngóo-tseh
肉粽紅龜粿
bah-tsàng âng-ku-kué
阮也無問題喔
gún iā bô-būn-tuê–ooh
爽快一喙吞一个
sóng-khuài tsi̍t-tshuì thun tsi̍t-ê
食甲袂講話
tsia̍h kah buē kóng-uē
八月半中秋節
peh-gue̍h-puànn Tiong-tshiu-tseh
肉餅三十个
bah-piánn sann-tsa̍p ê
嫌少無嫌濟
hiâm tsió bô hiâm tsuē
五仁肉餅包豆沙
ngóo-jîn bah-piánn pau tāu-se
那食那賞月喔
ná tsia̍h ná siúnn-gue̍h–ooh
九月初重陽節
káu-gue̍h tshe Tiông-iông-tseh
厝內請人客
tshù-lāi tshiánn-lâng-kheh
料理辦真濟喔
liāu-lí pān tsin tsē–ooh
王梨龍眼配西瓜
ông-lâi lîng-gíng phuè si-kue
食甲開心花
tsia̍h kah kui sim-hue
過冬節又尾牙
kuè tang-tseh iū bué-gê
已經是年尾
í-king sī nî-bué
補冬好時節
póo-tang hó sî-tseh
食甲肥肥又白白
tsia̍h kah puî-puî iū pe̍h-pe̍h
又閣加一歲喔
iū-koh ke tsi̍t-huè–ooh
