總愛靠家己
《總愛靠家己》Tsóng Ài Khò Ka-tī
葉紫凌Ia̍p Tsí-lîng
——————————————
世間到處有青山
sè-kan tò-tshú iú tshing-san
毋通欲靠別人
m̄-thang beh khò pa̍t-lâng
總是愛靠著咱家己
tsóng–sī ài khò-tio̍h lán ka-tī
才有好的前途
tsiah ū hó ê tsiân-tôo
毋免驚透風佮落雨
m̄-bián kiann thàu-hong kah lo̍h-hōo
風雨落偌粗
hong-hōo lo̍h guā tshoo
忍受一切困難佮痛苦
jím-siū it-tshè khùn-lân kah thòng-khóo
才有光明路途
tsiah ū kong-bîng lōo-tôo
家己前途家己拚
ka-tī tsiân-tôo ka-tī piànn
毋通來失志氣
m̄-thang lâi sit tsì-khì
總是有出頭彼一日
tsóng–sī ū tshut-thâu hit-tsi̍t-ji̍t
達著你的希望
ta̍t-tio̍h lí ê hi-bāng
好歹代誌認予清
hó-pháinn tāi-tsì jīn hōo tshing
是非愛分明
sī-hui ài hun-bîng
堅心志氣受苦肯犧牲
kian-sim tsì-khì siū-khóo khíng hi-sing
才有光明前程
tsiah ū kong-bîng tsiân-thîng
