像我這款人
《像我這款人》Tshiūnn Guá Tsit Khuán Lâng
楊肅浩Iûnn Siok-hō
——————————————
我這款人啊
guá tsit khuán lâng–ah
講來嘛無啥
kóng–lâi mā bô-siánn
不時囥一捾鎖匙
put-sî khǹg tsi̍t-kuānn só-sî
佇橐袋仔
tī lak-tē-á
拍會開的
phah ē-khui–ê
是過去的運命
sī kuè-khì ê ūn-miā
拍袂開的
phah buē-khui–ê
是彼本戶口簿仔
sī hit pún hōo-kháu-phōo-á
我這款人啊
guá tsit khuán lâng–ah
定定驚孤單
tiānn-tiānn kiann koo-tuann
有幾支鎖匙
ū kuí-ki só-sî
前後囥佇怹遐
tsîng-āu khǹg tī in hia
生活
sing-ua̍h
畫妝是欲予誰看
uē-tsong sī beh hōo siáng khuànn
幾支鎖匙
kuí-ki só-sî
閣轉來倒邊的屜仔
koh tńg-lâi tò-pinn ê thuah-á
一台車
tsi̍t-tâi tshia
來來去去幾个聲
lâi-lâi-khì-khì kuí-ê siann
嘛是貼心乖巧
mā sī tah-sim kuai-khá
溫柔的名
un-jiû ê miâ
副駕駛的位
hù-kà-sú ê uī
空空佇遐
khang-khang tī hia
越頭無人問阮欲食啥
ua̍t-thâu bô-lâng mn̄g gún beh tsia̍h siánn
像我這款人啊
tshiūnn guá tsit khuán lâng–ah
只顧家己快活
tsí kòo ka-kī khuìnn-ua̍h
性地一來
sìng-tē tsi̍t-lâi
真濟代誌袂收山
tsin tsē tāi-tsì buē-siu-suann
一个看袂著對方需要的伴
tsi̍t-ê khuànn buē-tio̍h tuì-hong su-iàu ê phuānn
有啥物資格
ū siánn-mih tsu-keh
去期待人穿新娘衫
khì kî-thāi lâng tshīng sin-niû-sann
像我這款人啊
tshiūnn guá tsit khuán lâng–ah
叫是家己偌奢颺
kiò-sī ka-kī guā tshia-iānn
心內蹛一个
sim-lāi tuà tsi̍t-ê
猶未大漢的囡仔
iáu-buē tuā-hàn ê gín-á
遺憾是分開了後
uî-hām sī hun-khui liáu-āu
才知影
tsiah tsai-iánn
予人愛過的彼个我
hōo-lâng ài–kuè ê hit ê guá
有偌好命
ū guā hó-miā
—
像我這款人啊
tshiūnn guá tsit khuán lâng–ah
閣通期待啥
koh thang kî-thāi siánn
欲講的話
beh kóng ê uē
到尾嘛是講袂伸捙
kàu-bué mā sī kóng buē tshun-tshia
袂當予伊好命的查某囡仔
buē-tàng hōo i hó-miā ê tsa-bóo-gín-á
嘛是曾經刻佇心肝的名
mā sī tsan-king khik tī sim-kuann ê miâ
像我這款人啊
tshiūnn guá tsit khuán lâng–ah
落塗就註定
lo̍h-thôo tiō tsù-tiānn
註定是四界流浪的囡仔
tsù-tiānn sī sì-kè liû-lōng ê gín-á
遺憾是
uî-hām sī
彼條圍巾猶囥佇遐
hit tiâu uî-kin iáu khǹg tī hia
像我這款人啊
tshiūnn guá tsit khuán lâng–ah
孤單拄好爾爾
koo-tuann tú-hó niā-niā
遺憾是
uî-hām sī
上好的青春留佇遐
siōng-hó ê tshing-tshun lâu tī hia
像我這款人啊
tshiūnn guá tsit khuán lâng–ah
孤單拄好爾爾
koo-tuann tú-hó niā-niā
