接航
《接航》Tsiap Hâng
曾育璇Tsan Io̍k-suân(泉州)
——————————————
佮你熟似佇這个秋天
kah lí si̍k-sāi tī tsit ê tshiu-thinn
你講秋天
lí kóng tshiu-thinn
是一年上媠
sī tsi̍t-nî siōng suí
愛我的話
ài guá ê uē
你無講出喙
lí bô kóng tshut-tshuì
但我已看著你心花開
tān guá í khuànn-tio̍h lí sim-hue khui
日漸一日
ji̍t-tsiām-tsi̍t-ji̍t
更加痴戀你
kìng-ka tshi-luân lí
但為前途
tān uī tsiân-tôo
你暫時離開
lí tsiām-sî lī-khui
一年一年
tsi̍t-nî-tsi̍t-nî
我暝日相思
guá mî-ji̍t siunn-si
今日你欲轉來阮身邊
kim-ji̍t lí beh tńg-lâi gún sin-pinn
第一擺為你將喙脣抹紅紅
tē-it pái uî lí tsiong tshuì-tûn buah âng-âng
為著見我的心上人
uī-tio̍h kìnn guá ê sim-siōng-lâng
當初我將手巾來相送
tong-tshoo guá tsiong tshiú-kin lâi sio-sàng
毋知你敢有帶佇身旁
m̄-tsai lí kám ū tuà tī sin pâng
我望啊望等啊等
guá bāng–ah bāng tán–ah tán
感謝蒼天無負苦心人
kám-siā tshong-thinn bô hū khóo-sim lâng
今日妝予媠媠來接航
kim-ji̍t tsng hōo suí-suí lâi tsiap hâng
從今以後
tsiông-kim í-āu
你會當陪佇阮身旁
lí ē-tàng puê tī gún sin pâng
