歌星夢
《歌星夢》Kua-tshinn Bāng
陳一Tân It
——————————————
阮做著歌手
gún tsuè tio̍h kua-tshiú
已經兩三年
í-king nn̄g-sann nî
身穿著禮服
sin tshīng tio̍h lé-ho̍k
每日妝媠媠
muí-ji̍t tsng suí-suí
期待出名佮出頭天
kî-thāi tshut-miâ kah tshut-thâu-thinn
拚命咧趁錢
piànn-miā teh thàn-tsînn
好佳哉人客有義
hó-ka-tsài lâng-kheh ū-gī
助阮有勇氣
tsōo gún ū ióng-khì
啊~舞臺燈光咧閃爍
ah~ bú-tâi ting-kng teh siám-sih
隨著音樂唸歌詩
suî tio̍h im-ga̍k liām kua-si
喜怒哀樂來表示
hí-nōo ai-lo̍k lâi piáu-sī
搖來搖去
iô-lâi-iô-khì
為著欲予人客歡喜
uī-tio̍h beh hōo lâng-kheh huann-hí
點歌攏無推辭
tiám-kua lóng bô the-sî
阮也真正歡喜
gún iā tsin-tsiànn huann-hí
繼續唱落去
kè-sio̍k tshiùnn–lo̍h-khì
因為阮的美夢
in-uī gún ê bí-bāng
做紅歌星
tsuè âng kua-tshinn
↓↓(口白)—(口白)—(口白)↓↓
啊~為著環境來所致
ah~ uī-tio̍h khuân-kíng lâi sóo-tì
才著每日走場唸歌詩
tsiah tio̍h muí-ji̍t tsáu-tiûnn liām kua-si
若想起著洪榮宏佮余天
nā siūnn-khí tio̍h Âng Îng-hông kah Î Thian
怹攏趁甲遐濟錢
in lóng thàn kah hiah tsē tsînn
就引阮暗暗目屎滴
tsiū ín gún àm-àm ba̍k-sái tih
好佳哉
hó-ka-tsài
人客助阮的勇氣
lâng-kheh tsōo gún ê ióng-khì
阮才繼續唱落去
gún tsiah kè-sio̍k tshiùnn–lo̍h-khì
希望有一日
hi-bāng ū-tsi̍t-ji̍t
阮也會當成為一位紅歌星啦
gún iā ē-tàng sîng-uî tsi̍t uī âng kua-tshinn–lah
