可惜毋捌字
《可惜毋捌字》Khó-sioh M̄-bat-jī
金田Kim-tiân
——————————————
現代文化
hiān-tāi bûn-huà
進步到了工業的社會
tsìn-pōo kàu liáu kang-gia̍p ê siā-huē
義務教育九年制
gī-bū kàu-io̍k káu-nî-tsè
人人有讀冊
lâng-lâng ū tha̍k-tsheh
想著阮
siūnn-tio̍h gún
較早環境壓迫
khah-tsá khuân-kíng ap-pik
冊讀無偌濟
tsheh tha̍k bô guā-tsē
可惜可惜阮毋捌字
khó-sioh khó-sioh gún m̄-bat-jī
才著做工課
tsiah tio̍h tsuè khang-khuè
隔壁阿婆提一張批
keh-piah a-pô the̍h tsi̍t-tiunn phue
叫阮共看覓
kiò gún kā khuànn-māi
講是怹囝去臺北
kóng sī in kiánn khì Tâi-pak
認真咧拍拚
jīn-tsin teh phah-piànn
今日寫批寄轉來
kim-ji̍t siá-phue kià–tńg-lâi
毋知啥物代
m̄-tsai siánn-mih tāi
可惜可惜阮毋捌字
khó-sioh khó-sioh gún m̄-bat-jī
詳細看毋知
siông-sè khuànn m̄-tsai
對面彼个小姐
tuì-bīn hit ê sió-tsiá
生做美麗又可愛
sinn-tsuè bí-lē iū khó-ài
前日佮伊來熟似
tsîng-ji̍t kah i lâi si̍k-sāi
對阮表情愛
tuì gún piáu tsîng-ài
寫一張批來予我
siá tsi̍t-tiunn phue lâi hōo guá
我是看毋知
guá sī khuànn m̄-tsai
可惜可惜阮毋捌字
khó-sioh khó-sioh gún m̄-bat-jī
怨嘆在心內
uàn-thàn tsāi sim-lāi
