小花
《小花》Sió-hue
玟靈Bûn-lîng
——————————————
有時陣
ū-sî-tsūn
烏雲母來來去去
oo hûn-bó lâi-lâi-khì-khì
烏陰天逼著我
oo-im-thinn pik tio̍h guá
無法度喘氣
bô-huat-tōo tshuán-khuì
親像孤單
tshin-tshiūnn koo-tuann
隨風飄的種子
suî hong phiau ê tsíng-tsí
揣袂著溫暖的土地
tshuē buē-tio̍h un-luán ê thóo-tē
嘛無伴做伙
mā bô-phuānn tsò-hué
人攏笑我咧數想
lâng lóng tshiò guá teh siàu-siūnn
一蕊小花想欲紅
tsi̍t-luí sió-hue siūnn-beh âng
雖然日頭赤焱
sui-jiân ji̍t-thâu tshiah-iānn
風雨無情
hong-hōo bô-tsîng
我也是毋放棄
guá iā-sī m̄ hòng-khì
人攏笑我咧數想
lâng lóng tshiò guá teh siàu-siūnn
一蕊小花想欲開
tsi̍t-luí sió-hue siūnn-beh khui
毋是想欲拚輸贏
m̄-sī siūnn-beh piànn-su-iânn
毋是想欲出頭天
m̄-sī siūnn-beh tshut-thâu-thinn
只是歡喜咧做一个
tsí-sī huann-hí eh tsuè tsi̍t-ê
認份的戇人
jīn-hūn ê gōng-lâng
每一个眠夢的人
muí tsi̍t-ê bîn-bāng ê lâng
攏仝款
lóng kāng-khuán
為著理想
uī-tio̍h lí-sióng
毋驚命運的創治
m̄-kiann miā-ūn ê tshòng-tī
就算目箍含淚
tiō-sǹg ba̍k-khoo hâm luī
喙角起顫
tshuì-kak khí tsùn
嘛欲拚命
mā beh piànn-miā
揣著燒熱的日頭光
tshuē-tio̍h sio-jua̍h ê ji̍t-thâu kng
—
若是世間上殘忍
nā sī sè-kan-siōng tsân-jím
無細膩流汗流血
bô-sè-jī lâu-kuānn lâu-hueh
攑頭一看
gia̍h-thâu tsi̍t-khuànn
愛記得闊莽莽的天
ài kì-tit khuah-bóng-bóng ê thinn
