恁爸
《恁爸》Lín-pē
男子漢樂團Lâm-tsú-hàn Ga̍k-thuân
——————————————
今夜啉著最後一杯酒
kim-iā lim tio̍h tsuè-āu tsi̍t-pue tsiú
夭壽喔
iáu-siū–ooh
已經兩點半
í-king nn̄g-tiám-puànn
明仔透早是硬篤的班
bîn-á thàu-tsá sī ngē-táu ê pan
目睭擘金
ba̍k-tsiu peh-kim
手機仔提來眼
tshiú-ki-á the̍h-lâi gán
俺娘喂
án-niâ–uê
已經八點半
í-king peh-tiám-puànn
引擎催落催落催落
e̋n-jín tshui–lueh tshui–lueh tshui–lueh
一輪一百
tsi̍t-lián tsi̍t-pah
路邊的風景
lōo-pi̍nn ê hong-kíng
仝款無變化
kāng-khuán bô piàn-huà
只有花草
tsí-ū hue-tsháu
一工一工大
tsi̍t-kang-tsi̍t-kang tuā
厝頂的鳥仔
tshù-tíng ê tsiáu-á
逐工唱著歌
ta̍k-kang tshiùnn tio̍h kua
種田的阿媽
tsìng-tshân ê a-má
對阮講𠢕早
tuì gún kóng gâu-tsá
恁爸毋甘願無變化的生活
lín-pē m̄ kam-guān bô piàn-huà ê sing-ua̍h
一个人的理想有偌大
tsi̍t-ê lâng ê lí-sióng ū guā tuā
向望一世人
ǹg-bāng tsi̍t-sì-lâng
會當活了精彩
ē-tàng ua̍h liáu tsing-tshái
無相仝的未來
bô sio-kāng ê bī-lâi
啊恁爸揬𡳞無氣魄的查埔囝
ah lín-pē tu̍h-lān bô khì-phik ê tsa-poo-kiánn
煞予家己變成這款人
suah hōo ka-kī piàn-sîng tsit khuán lâng
手中一枝薰
tshiú-tiong tsi̍t-ki hun
吐出茫茫的世界
thòo-tshut bâng-bâng ê sè-kài
薰著我的目睭
hun tio̍h guá ê ba̍k-tsiu
恁爸流目屎
lín-pē lâu ba̍k-sái
—
下晡時仔
ē-poo-sî-á
日頭欲落山
ji̍t-thâu beh lo̍h-suann
足忝的
tsiok thiám–ê
已經袂hiunnh矣
í-king buē hiunnh–ah
轉去的路暗眠挲貓
tńg-khì ê lōo àm-bîn-so-niau
又閣來到最後一杯酒
iū-koh lâi-kàu tsuè-āu tsi̍t-pue tsiú
救人喔
kiù-lâng–ooh
故事哪會攏仝款
kòo-sū ná ē lóng kāng-khuán
一暝過一工
tsi̍t-mê kuè tsi̍t-kang
啊攏總相仝
ah lóng-tsóng sio-kāng
