綠島之夜

《綠島之夜》Li̍k-tó tsi Iā
文夏Bûn-hā
文香Bûn-hiong
——————————————
月光暝踮在樹跤
ge̍h-kng-mî tiàm-tsāi tshiū-kha
逐家快樂來唸歌
ta̍k-ke khuài-lo̍k lâi liām-kua
唱出著甘蜜歌聲
tshiùnn-tshut tio̍h kam-bi̍t kua-siann
予人心歡喜唷
hōo-lâng sim huann-hí–iooh
烏烏的長長頭毛
oo-oo ê tn̂g-tn̂g thâu-mn̂g
可愛的姑娘
khó-ài ê koo-niû
可愛的姑娘唷
khó-ài ê koo-niû–iooh

愛人你今夜這時
ài-jîn lí kim-iā tsit-sî
到底睏去抑未睏
tàu-tué khùn khì ia̍h bē khùn
靜靜的海邊景緻
tsīng-tsīng ê hái-pinn kíng-tì
予人心稀微唷
hōo-lâng sim hi-bî–iooh
南風若吹來暗暝
lâm-hong nā tshue–lâi àm-mî
實在睏袂去
si̍t-tsāi khùn bē khì
實在睏袂去唷
si̍t-tsāi khùn bē khì–iooh

鄉村的迎神祭典
hiong-tshuan ê gîng-sîn tsè-tián
七日又閣有七夜
tshit-ji̍t iū-koh ū tshit-iā
逐家來海邊跳舞
ta̍k-ke lâi hái-pinn thiàu-bú
月光的暗暝唷
ge̍h-kng ê àm-mî–iooh
伴樂聲
phuānn ga̍k-siann
一隻一隻
tsi̍t-tsiah tsi̍t-tsiah
船隻欲出去
tsûn-tsiah beh tshut–khì
船隻欲出去唷
tsûn-tsiah beh tshut–khì iooh

我送你一對手指
guá sàng lí tsi̍t-tuì tshiú-tsí
當做訂婚的送品
tòng-tsò tīng-hun ê sàng-phín
咱兩人愛情無變
lán nn̄g lâng ài-tsîng bô-piàn
做著好伴侶唷
tsuè tio̍h hó phuānn-lī–iooh
永遠是一个心肝
íng-uán sī tsi̍t-ê sim-kuann
心愛的姑娘
sim-ài ê koo-niû
心愛的姑娘唷
sim-ài ê koo-niû–iooh