舊竹篙
《舊竹篙》Kū Tik-ko
魏正豪Guī Tsìng-hô
——————————————
窗外彼支的舊竹篙
thang-guā hit ki ê kū tik-ko
刻著阿母辛苦佮操勞
khik tio̍h a-bú sin-khóo kah tshau-lô
每工日出做到日落
muí-kang ji̍t-tshut tsò kah ji̍t-lo̍h
實實仔拚
si̍t-si̍t-á piànn
恬恬仔做
tiām-tiām-á tsò
阿母一生
a-bú it-sing
攏是為囝煩惱
lóng-sī uī kiánn huân-ló
將食苦當做食補
tsiong tsia̍h-khóo tòng-tsuè tsia̍h-póo
親像彼支的舊竹篙
tshin-tshiūnn hit ki ê kū tik-ko
忍受大雨淋大風搖
jím-siū tuā-hōo lâm tuā-hong iô
阿母疼囝如寶
a-bú thiànn kiánn jû pó
付出著伊的全部
hù-tshut tio̍h i ê tsuân-pōo
為著這个家
uī-tio̍h tsit ê ke
儉腸凹肚
khiām-tn̂g neh-tōo
你的後半世人
lí ê āu puànn-sì-lâng
阮會予你倚靠
gún ē hōo lí uá-khò
咱的親情
lán ê tshin-tsîng
像袂變質的寶石
tshiūnn buē piàn-tsit ê pó-tsio̍h
