母仔
《母仔》Bú–á
陳怡婷Tân Î-tîng
——————————————
別人妝媠媠
pa̍t-lâng tsng suí-suí
伊是滿面皺痕
i sī muá-bīn jiâu-hûn
為著厝內拚入拚出
uī-tio̍h tshù-lāi piànn-ji̍p piànn-tshut
雙手的傷痕
siang-tshiú ê siong-hûn
藏著心酸的靈魂
tshàng tio̍h sim-sng ê lîng-hûn
伊從來也毋捌怨恨
i tsiông-lâi iā m̄-bat uàn-hūn
別人咧快活
pa̍t-lâng teh khuìnn-ua̍h
伊是勤儉縖腹腸
i sī khîn-khiām hâ pak-tn̂g
上好的物件攏留予阮
siōng-hó ê mi̍h-kiānn lóng lâu hōo gún
伊講阮是伊
i kóng gún sī i
今生上大的幸運
kim-sing siōng tuā ê hīng-ūn
為阮願意犧牲付出
uī gún guān-ì hi-sing hù-tshut
阿母啊
a-bú–ah
將阮飼甲遮爾大
tsiong gún tshī kah tsiah-nī tuā
毋捌怨嘆
m̄-pat uàn-thàn
也毋捌快活
iā m̄-pat khuìnn-ua̍h
伊講咱
i kóng lán
健康快樂做好囝
kiān-khong khuài-lo̍k tsuè hó-kiánn
大細平安
tuā-sè pîng-an
就是伊的願望
tiō-sī i ê guān-bāng
阿母啊
a-bú–ah
你的恩情比天大
lí ê un-tsîng pí thinn tuā
這份情
tsit hūn tsîng
阮會會記一世人
gún ē ē-kì tsi̍t-sì-lâng
阮會將你有孝來報答
gún ē tsiong lí iú-hàu lâi pò-tap
永遠來做你的寶貝囡仔
íng-uán lâi tsuè lí ê pó-puè-gín-á
