月光暝
《月光暝》Gue̍h-kng-mî
陳怡婷Tân Î-tîng
——————————————
窗外的風微微
thang-guā ê hong bî-bî
吹來感覺四序
tshue–lâi kám-kak sù-sī
攑頭看向天邊
gia̍h-thâu khuànn hiòng thinn-pinn
今夜的月當圓
kim-iā ê gue̍h tng înn
月光掖入窗邊
gue̍h-kng iā ji̍p thang-pinn
照佇阮的鋼琴
tsiò tī gún ê kǹg-khîm
想欲演奏一首月光
siūnn-beh ián-tsàu tsi̍t-siú gue̍h-kng
來送予你
lâi sàng hōo lí
想起心愛的伊
siūnn-khí sim-ài ê i
想欲予你聽見
siūnn-beh hōo lí thiann–kìnn
思思念念的心
su-su-liām-liām ê sim
親像天頂的星
tshin-tshiūnn thinn-tíng ê tshinn
感謝予阮拄著你
kám-siā hōo gún tú-tio̍h lí
感受著愛的滋味
kám-siū tio̍h ài ê tsu-bī
毋免千言萬語
m̄-bián tshian-giân bān-gí
予阮用歌聲來送予你
hōo gún iōng kua-siann lâi sàng hōo lí
白色的月光暝
pe̍h-sik ê gue̍h-kng-mî
照著在阮窗邊
tsiò tio̍h tsāi gún thang-pinn
天頂的星閃閃爍爍
thinn-tíng ê tshinn siám-siám-sih-sih
毋知你這馬敢有看見
m̄-tsai lí tsit-má kám ū khuànn–kìnn
溫柔的月光暝
un jiû ê gue̍h-kng-mî
陪阮度過稀微
puê gún tōo-kuè hi-bî
攑頭看見月娘的圓
gia̍h-thâu khuànn-kìnn gue̍h-niû ê înn
遮爾仔媠
tsiah-nī-á suí
