有孝毋免揀時陣
《有孝毋免揀時陣》Iú-hàu M̄-bián Kíng Sî-tsūn
郭婷筠Kueh Tîng-ûn
——————————————
夜深更
iā tshim-kinn
踏著針車猶未睏
ta̍h-tio̍h tsiam-tshia iáu-buē khùn
天光伊就咧款早頓
thinn kng i tiō leh khuán tsá-tǹg
一切拍算
it-tshè phah-sǹg
攏是為著囝兒孫
lóng-sī uī-tio̍h kiánn-jî-sun
一生操心硩腹
it-sing tshau-sim-teh-pak
無時無陣
bô-sî-bô-tīn
啊~疼囝無窮分
ah~ thiànn kiánn bô khîng-hun
母愛無議論
bú-ài bô gī-lūn
過去是我較慢鈍
kuè-khì sī guá khah bān-tūn
雄雄看著伊
hiông-hiông khuànn-tio̍h i
白髮佮皺痕
pe̍h-huat kah jiâu-hûn
想著我的不孝淚滾滾
siūnn-tio̍h guá ê put-hàu luī kún-kún
啊~歲月無窮分
ah~ suè-gua̍t bô khîng-hun
緣份咧倒算
iân-hūn teh tò-sǹg
報答親恩無一寸
pò-tap tshin-un bô tsi̍t-tshùn
毋免等好額
m̄-bián tán hó-gia̍h
毋免等出運
m̄-bián tán tshut-ūn
若欲有孝毋免揀時陣
nā beh iú-hàu m̄-bián kíng sî-tsūn
