叫著你的名

《叫著你的名》Kiò Tio̍h Lí ê Miâ

江志豐Kang Tsì-hong

——————————————

燈下孤單行

ting-hā koo-tuann kiânn

只有記持做伴

tsí-ū kì-tî tsuè-phuānn

踏碎落葉的聲

ta̍h-tshuì lo̍h-hio̍h ê siann

刺疼阮心肝

tshì-thiànn gún sim-kuann

月娘的心情

ge̍h-niû ê sim-tsiânn

天星敢會知影

thinn-tshinn kám ē tsai-iánn

暗淡的光線

àm-tām ê kng-suànn

照佇相思的被單

tsiò tī siunn-si ê phuē-tuann

聲聲叫著你的名

siann-siann kiò tio̍h lí ê miâ

今生今世的牽掛

kim-sing kim-sè ê khian-kuà

敢講分開是註定

kám-kóng hun-khui sī tsù-tiānn

後悔已經無較縒

hiō-hué í-king bô-khah-tsua̍h

聲聲叫著你的名

siann-siann kiò tio̍h lí ê miâ

漸漸生疏的感覺啊

tsiām-tsiām tshinn-soo ê kám-kak–ah

痴心路途行袂煞

tshi-sim lōo-tôo kiânn buē-suah

你的笑容

lí ê tshiò-iông

敢閣佇遐

kám koh tī hia