一个人的生日快樂
《一个人的生日快樂》Tsi̍t-ê-lâng ê Sinn-ji̍t Khuài-lo̍k
江志豐Kang Tsì-hong
——————————————
佇今仔日
tī kin-á-ji̍t
我又過著
guá iū kuè tio̍h
我家己的生日快樂
guá ka-kī ê senn-ji̍t khuài-lo̍k
得袂著你祝福
tit buē-tio̍h lí tsiok-hok
烏暗當中的雞卵糕
oo-àm tang-tiong ê ke-nn̄g-ko
頂面的蠟燭火
tíng-bīn ê la̍h-tsik hué
猶咧著
iáu teh to̍h
仝款這間
kāng-khuán tsit king
定定來的KTV
tiānn-tiānn lâi ê KTV
點唱的歌
tiám tshiùnn ê kua
是舊情也綿綿
sī kū-tsîng iā mî-mî
佇我心內
tī guá sim-lāi
猶原是你
iu-guân sī lí
敢講你已經來放袂記
kám-kóng lí í-king lâi pàng-buē-kì
一个人的生日快樂
tsi̍t-ê-lâng ê senn-ji̍t khuài-lo̍k
唱甲唱袂出聲的
tshiùnn kah tshiùnn buē-tshut siann ê
彼句愛情路
hit kù ài-tsîng-lōo
咱的感情
lán ê kám-tsîng
哪會欲進無步
ná ē beh tsìn bô pōo
你的愛親像西北雨
lí ê ài tshin-tshiūnn sai-pak-hōo
全部落佇我的目箍
tsuân-pōo lo̍h tī guá ê ba̍k-khoo
一个人的生日快樂
tsi̍t-ê-lâng ê senn-ji̍t khuài-lo̍k
我敢通閣為你執迷不悟
guá kám thang koh uī lí tsip-bê put-ngōo
你也已經揣著你的幸福
lí iā í-king tshuē-tio̍h lí ê hīng-hok
我猶閣只有一个人
guá iáu-koh tsí-ū tsi̍t-ê lâng
過著我家己的生日快樂
kuè tio̍h guá ka-kī ê senn-ji̍t khuài-lo̍k
