阿公胸坎的彼尾龍
《阿公胸坎的彼尾龍》A-kong Hing-khám ê Hit Bué Lîng
張四十三Tiunn Sì-tsa̍p-sann
——————————————
阿公的胸坎仔
a-kong ê hing-khám-á
有一尾龍
ū tsi̍t-bué lîng
對頭到尾
uì thâu kàu bé
足足有三尺長
tsiok-tsiok ū sann-tshioh tn̂g
趖來趖去
sô-lâi-sô-khì
伊無食嘛無睏
i bô tsia̍h mā bô khùn
伊是阮細漢的眠床
i sī gún sè-hàn ê bîn-tshn̂g
阿公的胸坎仔
a-kong ê hing-khám-á
有一尾龍啊
ū tsi̍t-bué lîng–ah
遠遠看去
hn̄g-hn̄g khuànn–khì
若親像一蕊雲
ná-tshin-tshiūnn tsi̍t-luí hûn
飛來飛去
pue-lâi-pue-khì
無怨也無恨
bô uàn iā bô hūn
伊是阮阿公永遠的愛人
i sī gún a-kong íng-uán ê ài-jîn
阿公仔阿公仔
a-kong-á a-kong-á
胸坎的彼尾龍
hing-khám ê hit bué lîng
是阮兜大大細細的門神
sī gún tau tuā-tuā-sè-sè ê mn̂g-sîn
查埔看著
tsa-poo khuànn–tio̍h
是驚甲跤手冷
sī kiann kah kha-tshiú líng
查某人想欲倚去共伊唚
tsa-bóo-lâng siūnn-beh uá khì kā-i tsim
—
女)
伊是呂厝庄出名的緣投仔桑
i sī Lū-tshù-tsng tshut-miâ ê iân-tâu-á-sàng
一生飄撇的男子漢
it-sing phiau-phiat ê lâm-tsú-hàn
生做懸懸
senn-tsò kuân-kuân
烏啊烏頭鬃
oo–ah oo thâu-tsang
看著伊
khuànn-tio̍h i
阮面就會紅
gún bīn tiō ē âng
伊佇縱貫線有啊名聲
i-tī tsiòng-kuàn-suànn ū–ah miâ-siann
人叫絞螺仔風飛沙
lâng kiò ká-lê-á-hong-pue-sua
出門騎一台孔啊明車
tshut-mn̂g khiâ tsi̍t-tâi khóng–ah bîng-tshia
但是定定醉甲挵著壁
tān-sī tiānn-tiānn tsuì kah lòng-tio̍h piah
