風雨蕭聲
《風雨蕭聲》Hong-ú Siau-siann
林燕Lîm Iàn
黃瑞琪N̂g Suī-kî
——————————————
小芬
Sió-hun
小芬
Sió-hun
小芬
Sió-hun
–
烏暗暗恐怖海邊
oo-àm-àm khióng-pòo hái-pinn
波浪聲連天
pho-lōng siann liân-thinn
暴風雨可怕暗暝
pō-hong-ú khó-phà àm-mî
行到海岸邊
kiânn kàu hái-huānn-pinn
今日是伊結婚日子
kim-ji̍t sī i kiat-hun ji̍t-tsí
忍不住心傷悲
jím put-tsū sim siong-pi
看伊欲離開去
khuànn i beh lī-khui–khì
何時再相見
hô-sî tsài sio-kìnn
↓↓(口白)—(口白)—(口白)↓↓
小芬小芬小芬
Sió-hun Sió-hun Sió-hun
你哪會走來遮呢
lí ná ē tsáu-lâi tsia–neh
你毋免管我
lí m̄-bián kuán guá
今仔日是你結婚的日子
kin-á-ji̍t sī lí kiat-hun ê ji̍t-tsí
你不應該將新娘放咧
lí put-ing-kai tsiong sin-niû pàng–leh
來遮揣我
lâi tsia tshē guá
你緊轉去
lí kín tńg–khì
你緊轉去
lí kín tńg–khì
無感無情
bô-kám-bô-tsîng
無同意的婚姻
bô tông-ì ê hun-in
我無承認
guá bô sîng-jīn
我欲佮你做伙
guá beh kah lí tsò-hué
拜託咧
pài-thok–leh
你毋通按呢講
lí m̄-thang án-ni kóng
你若按呢
lí nā án-ni
我的良心會永遠不安
guá ê liông-sim ē íng-uán put-an
我自細漢
guá tsū-suè-hàn
是無人疼惜的孤女
sī bô-lâng thiànn-sioh ê koo-lú
佳哉是恁爸爸媽媽
ka-tsài sī lín pá-pah má-mah
共我抾轉去飼大漢
kā guá khioh tńg-khì tshī tuā-hàn
若親像我再生的爸母
ná-tshin-tshiūnn guá tsài-sinn ê pē-bú
這个恩情
tsit ê un-tsîng
我毋敢袂記
guá m̄-kánn buē-kì
你趕緊轉去啦
lí kuánn-kín tńg–khì lah
哼!恩情是恩情
hngh! un-tsîng sī un-tsîng
愛情是愛情
ài-tsîng sī ài-tsîng
這根本是兩回事嘛
tse kun-pún sī nn̄g-huê-sū–mah
咱兩个互相相愛
lán nn̄g-ê hōo-siong siong-ài
為啥物袂當結婚呢
uī-sí-mih buē-tàng kiat-hun–neh
所以我怨嘆怹啦
sóo-í guá uàn-thàn in–lah
我毋敢怨恨啥人
guá m̄-kánn uàn-hūn siánn-lâng
總講是咱的無緣
tsóng-kóng sī lán ê bô-iân
你毋通閣講紲落去矣
lí m̄-thang koh kóng suà–lo̍h-khì ah
若按呢
nā án-ne
你來遮欲創啥物咧
lí lâi tsia beh tshòng sí-mih–leh
我我只有想死
guá, guá tsí-ū siūnn sí
啥物!死
siánn-mih! sí
↑↑(口白)—(口白)—(口白)↑↑
伊對阮雖然有情
i tuì gún sui-jiân ū-tsîng
毋敢來答應
m̄-kánn lâi tah-ìng
波浪聲又叫無停
pho-lōng siann iū kiò bô-thîng
心內真分明
sim-lāi tsin hun-bîng
若親像替阮抱不平
ná-tshin-tshiūnn thuè gún phāu-put-phîng
總講為報恩情
tsóng-kóng uī pò un-tsîng
才著愛來犧牲
tsiah tio̍h-ài lâi hi-sing
決心了殘生
kuat-sim liáu tsân-sing
↓↓(口白)—(口白)—(口白)↓↓
小芬你既然想死
Sió-hun lí kì-jiân siūnn sí
我也欲佮你做陣死
guá iā beh kah lí tsò-tīn sí
袂用得
buē-īng-leh
你有家庭你有爸母
lí ū ka-tîng lí ū pē-bú
厝內猶有一个太太佇咧等你
tshù-lāi iáu-ū tsi̍t-ê thài-thài tī-leh tán lí
你
lí
我不管
guá put-kuán
我無答應我無同意的婚姻
guá bô tah-ìng guá bô tông-ì ê hun-in
我我無愛啦
guá, guá bô-ài–lah
你按呢做
lí án-ni tsuè
我敢毋是變成一个忘恩背義的人
guá kám m̄-sī piàn-sîng tsi̍t-ê bōng-un puē-gī ê lâng
你也變成一个不孝子
lí iā piàn-sîng tsi̍t-ê put-hàu-tsú
我願意做一个不孝囝
guá guān-ì tsò tsi̍t-ê put-hàu-kiánn
爸爸媽媽我真不孝
pá-pah má-mah guá tsin put-hàu
但是這攏是恁做得來的啦
tān-sī tse lóng-sī lín tsò-tit lâi ê–lah
誰叫恁叫我去娶別人
siáng kiò lín kiò guá khì tshuā pa̍t-lâng
拆散著阮的愛情
thiah-suànn tio̍h gún ê ài-tsîng
恁袂使完全怪我
lín bē-sài uân-tsuân kuài guá
怪恁家己傷固執好啦
kuài lín ka-kī siunn kòo-tsip hó–lah
真情真愛
tsin-tsîng tsin-ài
一對可憐的好伴侶
tsi̍t-tuì khó-liân ê hó phuānn-lū
有堅定的意志
ū kian-tīng ê ì-tsì
雖然毋是仝月仝日生
sui-jiân m̄-sī kāng-ge̍h kāng-ji̍t sinn
但願仝日死
tān-guān kāng-ji̍t sí
永遠兩相依
íng-uán lióng-siong-i
愛情永不移
ài-tsîng íng put-î
雙雙對對伴相隨
siang-siang tuì-tuì phuānn-sio-suî
天上結情義
thian-siōng kiat tsîng-gī
小芬
Sió-hun
我遮有一條皮帶
guá tsia ū tsi̍t-tiâu phuê-tuà
咱兩个縛做伙
lán nn̄g-ê pa̍k tsò-hué
雖然在生咱袂當做陣
sui-jiân tsāi-sinn lán bē-tàng tsò-tīn
死也甘願伴相隨啦
sí iā kam-guān phuānn-sio-suî–lah
↑↑(口白)—(口白)—(口白)↑↑
風蕭蕭
hong siau-siau
雨也飄飄
ú iā phiau-phiau
真情斷不了
tsin-tsîng tuān put-liáu
真感情成做重要
tsin kám-tsîng tsiânn-tsuè tiōng-iàu
啥人都明瞭
siánn-lâng to bîng-liâu
在生難得共度春宵
tsāi-sing lân-tit kiōng-tōo tshun-siau
在天是真逍遙
tsāi-thian sī tsin siau-iâu
有兩條神魂飄邈
ū nn̄g-tiâu sîn-hûn phiau-miáu
同唱安魂調
tông tshiùnn an-hûn-tiāu
