傷心夜快車
《傷心夜快車》Siong-sim Iā-khuài-tshia
林慶鐘Lîm Khìng-tsiong
——————————————
來離開悲情城市
lâi lī-khui pi-tsîng siânn-tshī
看破回鄉里
khuànn-phuà huê hiunn-lí
忍耐著心酸苦味
jím-nāi tio̍h sim-sng khóo-bī
珠淚澹目墘
tsu-luī tâm ba̍k-kînn
月臺電鈴聲音響亮
gua̍t-tâi tiān-lîng siann-im hiáng-liāng
加添心哀悲
ka-thiam sim ai-pi
無情風雨吹阮身邊
bô-tsîng hong-hōo tshue gún sin-pinn
跤手冷吱吱
kha-tshiú líng ki-ki
枉費阮真情實意
óng-huì gún tsin-tsîng si̍t-ì
這款對待伊
tsit khuán tuì-thāi i
上北的夜快車
tsiūnn-pak ê iā-khuài-tshia
車螺替阮悲
tshia-luê thuè gún pi
來離開無情城市
lâi lī-khui bô-tsîng siânn-tshī
看破回鄉里
khuànn-phuà huê hiunn-lí
怨恨你曷無帶念
uàn-hūn lí ia̍h-bô tài-liām
一點的情義
tsi̍t-tiám ê tsîng-gī
花言巧語害阮
hua-giân khá-gí hāi gún
暝日為伊心綿綿
mî-ji̍t uī i sim mî-mî
如今一切已經
jû-kim it-tshè í-king
變成一片的空虛
piàn-sîng tsi̍t-phìnn ê khang-hi
枉費阮真情實意
óng-huì gún tsin-tsîng si̍t-ì
被伊擲捒去
phuē i tàn-sak–khì
上北的夜快車
tsiūnn-pak ê iā-khuài-tshia
車螺替阮悲
tshia-luê thuè gún pi
來離開冷淡城市
lâi lī-khui líng-tām siânn-tshī
看破回鄉里
khuànn-phuà huê hiunn-lí
月臺邊燈火稀微
gua̍t-tâi pinn ting-hué hi-bî
親像阮失意
tshin-tshiūnn gún sit-ì
音樂聲音催阮珠淚
im-ga̍k siann-im tshui gún tsu-luī
親像雨水滴
tshin-tshiūnn hōo-tsuí tih
想起當時纏綿情義
siūnn-khí tong-sî tînn-mî tsîng-gī
心內苦無比
sim-lāi khóo bô-pí
枉費阮真情實意
óng-huì gún tsin-tsîng si̍t-ì
實在戇無比
si̍t-tsāi gōng bô-pí
上北的夜快車
tsiūnn-pak ê iā-khuài-tshia
車螺替阮悲
tshia-luê thuè gún pi
