毋敢唱情歌的人
《毋敢唱情歌的人》M̄-kánn Tshiùnn Tsîng-kua ê Lâng
元冠Guân-kuan
——————————————
世事沓沓滴滴
sè-sū ta̍p-ta̍p-tih-tih
我看著Mandy閣換一个Daddy
guá khuànn-tio̍h Mandy koh uānn tsi̍t-ê Daddy
過去遐的查埔
kuè-khì hia-ê tsa-poo
親像我仝款無所謂
tshin-tshiūnn guá kāng-khuán bô-sóo-uī
嘛無所費
mā bô sóo-huì
比啥款
pí siánn-khuán
存款無夠濟
tsûn-khuán bô-kàu tsē
鍊仔無夠金
liān-á bô-kàu kim
底蒂無夠深
té-tì bô-kàu tshim
唱袂出情投意愛
tshiùnn bē-tshut tsîng tâu ì-ài
浮冇冇的時代亂歌
phû-phànn-phànn ê sî-tāi luān-kua
賰我一个人穿彼領膨紗衫
tshun guá tsi̍t-ê-lâng tshīng hit niá phòng-se-sann
孤孤單單家己過生活
koo-koo-tuann-tuann ka-kī kuè sing-ua̍h
懷念彼暗房間內的芳
huâi-liām hit-àm pâng-king lāi ê phang
三十捅歲繼續夢
sann-tsa̍p-thóng huè kè-sio̍k bāng
繼續無暝無日來拍拚
kè-sio̍k bô-mê-bô-ji̍t lâi phah-piànn
空喙佮哺舌
khang-tshuì kah pōo-tsi̍h
我是一个毋敢唱情歌的人
guá sī tsi̍t-ê m̄-kánn tshiùnn tsîng-kua ê lâng
講啥物山盟海誓
kóng siánn-mih san-bîng hái-sè
講啥物袂後悔
kóng siánn-mih bē hiō-hué
啥物向望攏是假
siánn-mih ǹg-bāng lóng-sī ké
攏是白賊話
lóng-sī pe̍h-tsha̍t-uē
花言巧語
hua-giân khá-gí
攏是無影無跡的笑詼
lóng-sī bô-iánn-bô-tsiah ê tshiò-khue
講啥物山盟海誓
kóng siánn-mih san-bîng hái-sè
講啥物袂後悔
kóng siánn-mih bē hiō-hué
離離落落的社會
li-li-lak-lak ê siā-huē
哪有改變
ná-ū kái-piàn
愛啉法蘭西水
ài lim huat-lân-se-tsuí
佮意欶一口氣
kah-ì suh tsi̍t-kháu khuì
敨放壓力
tháu-pàng ap-li̍k
過去遐的查某
kuè-khì hia-ê tsa-bóo
敢若親像Sally
kánn-ná tshin-tshiūnn Sally
欲厝欲車閣想欲生後生
beh tshù beh tshia koh siūnn-beh senn hāu-sinn
時機無蓋好
sî-ki bô kài hó
時勢嘛毋著
sî-sè mā m̄-tio̍h
一暝全頭路
tsi̍t-mî tsuân thâu-lōo
天光無半步
thinn kng bô-puànn-pōo
誰知影伊心內怨嘆
siáng tsai-iánn i sim-lāi uàn-thàn
茫渺渺的時代戀歌
bông-biáu-biáu ê sî-tāi luân-kua
賰我一个穿彼領膨紗衫
tshun guá tsi̍t-ê tshīng hit niá phòng-se-sann
孤孤單單家己過生活
koo-koo-tuann-tuann ka-kī kuè sing-ua̍h
懷念彼暗房間內的人
huâi-liām hit-àm pâng-king lāi ê lâng
四十捅歲繼續夢
sì-tsa̍p-thóng huè kè-sio̍k bāng
繼續無暝無日來拍拚
kè-sio̍k bô-mê-bô-ji̍t lâi phah-piànn
無緣佮無意
bô-iân kah bô-ì
我是一个毋敢唱情歌的人
guá sī tsi̍t-ê m̄-kánn tshiùnn tsîng-kua ê lâng
