馬西馬西
《馬西馬西》Má-se-má-se
張一仁Tiunn It-jîn
——————————————
bì-luh啉予馬西馬西
bì-luh lim hōo má-se-má-se
憂頭結面創啥貨
iu-thâu-kat-bīn tshòng siánn-huè
頭殼犁犁肩胛垂垂
thâu-khak lê-lê king-kah suê-suê
啉落去莫想遐濟
lim–lo̍h-khì mài siūnn hiah tsuē
來乾杯
lâi kan-pue
做人上蓋重要
tsuè-lâng siōng-kài tiōng-iàu
著愛看會開
tio̍h-ài khuànn ē-khui
人生斤斤計較
jîn-sing kin-kin kè-kàu
有啥意義
ū siánn ì-gī
毋通只為功名名聲
m̄-thang tsí uī kong-bîng miâ-siann
拍拚過一生
phah-piànn kuè it-sing
bì-luh啉予馬西馬西
bì-luh lim hōo má-se-má-se
管伊無閒有穡頭
kuán i bô-îng ū sit-thâu
酒若落喉
tsiú nā lo̍h-âu
心就輕鬆
sim tiō khin-sang
大杯細杯攏乾杯
tuā-pue sè-pue lóng kan-pue
莫相推
mài sio-the
逐家有緣做陣
ta̍k-ke ū-iân tsuè-tīn
著愛講情義
tio̍h-ài kóng tsîng-gī
毋通囂囂俳俳
m̄-thang hiau-hiau-pai-pai
激一个氣
kik tsi̍t-ê khuì
互相鼓勵
hōo-siong kóo-lē
快快樂樂
khuài-khuài-lo̍k-lo̍k
幸福無地比
hīng-hok bô-tè pí
bì-luh啉予馬西馬西
bì-luh lim hōo má-se-má-se
唱出滿腹的痛苦
tshiùnn-tshut muá-pak ê thòng-khóo
看見對面彼个小姐
khuànn-kìnn tuì-bīn hit ê xiǎojiě
使著目尾笑微微
sái tio̍h ba̍k-bué tshiò bi-bi
頭楞楞
thâu gông-gông
手捀bì-luh
tshiú phâng bì-luh
招伊佮我乾一杯
tsio i kah guá kan tsi̍t-pue
搖來搖去
iô-lâi-iô-khì
親像咧眩船
tshin-tshiūnn teh hîn-tsûn
看伊歹勢
khuànn i pháinn-sè
我煞頭昏腦鈍鈍
guá suah thâu hūn náu tùn-tùn
bì-luh啉予馬西馬西
bì-luh lim hōo má-se-má-se
鬥陣講話到半暝
tàu-tīn kóng-uē kàu puànn-mî
看伊目屎含目墘
khuànn i ba̍k-sái kâm ba̍k-kînn
予阮感動心綿綿
hōo gún kám-tōng sim mî-mî
閣乾杯
koh kan-pue
大喙啉著bì-luh
tuā-tshuì lim tio̍h bì-luh
一杯閣一杯
tsi̍t-pue koh tsi̍t-pue
有你來陪伴阮
ū lí lâi puê-phuānn gún
予阮心茫茫
hōo gún sim bâng-bâng
我的真情
guá ê tsin-tsîng
只有會當送予你一人
tsí-ū ē-tàng sàng hōo lí tsi̍t-lâng
bì-luh啉予馬西馬西
bì-luh lim hōo má-se-má-se
管伊跤浮頭殼楞
kuán i kha phû thâu-khak gông
有你伴阮心內歡喜
ū lí phuānn gún sim-lāi huann-hí
希望你我莫分開
hi-bāng lí guá mài hun-khui
bì-luh啉予馬西馬西
bì-luh lim hōo má-se-má-se
管伊跤浮頭殼楞
kuán i kha phû thâu-khak gông
有你伴阮心內歡喜
ū lí phuānn gún sim-lāi huann-hí
希望你我莫分開
hi-bāng lí guá mài hun-khui
閣乾杯
koh kan-pue
