半燒冷
《半燒冷》Puànn-sio-líng
林美秀Lîm Bí-siù
——————————————
若問我日子是生做啥款
nā mn̄g guá ji̍t-tsí sī senn-tsuè siánn-khuán
生活過著敢有圓滿
sing-ua̍h kuè-tio̍h kám ū uân-buán
來來去去
lâi-lâi-khì-khì
世事冷暖
sè-sū líng-luán
無啥向望
bô-siánn ǹg-bāng
只求平安
tsí kiû pîng-an
時間咧過
sî-kan teh kuè
有時緊有時慢
ū-sî kín ū-sî bān
連鞭清心
liâm-mi tshing-sim
連鞭操煩
liâm-mi tshau-huân
櫥仔角的彼軀洋裝
tû-á-kak ê hit su iûnn-tsong
攏也相仝
lóng iā sio-kāng
只是阮淡薄仔無仝款
tsí-sī gún tām-po̍h-á bô kāng-khuán
半生半熟的年紀
puànn-tshenn puànn-si̍k ê nî-kí
半夢半醒的記持
puànn-bāng puànn-tshínn ê kì-tî
半真半假若像咧搬戲
puànn-tsin puànn-ké ná-tshiūnn teh puann-hì
半目開瞌較有趣味
puànn-ba̍k khui-kheh khah ū tshù-bī
半遠半近咧看你
puànn-hn̄g puànn-kīn teh khuànn lí
目鏡毋知換過幾若支
ba̍k-kiànn m̄-tsai uānn kuè kuí-lō ki
半燒半冷
puànn-sio puànn-líng
上拄好的距離
siōng tú-hó ê kū-lî
半酸半甜
puànn-sng puànn-tinn
上甘的滋味
siōng kam ê tsu-bī
