你食飽矣未
《你食飽矣未》Lí Tsia̍h-pá–ah Buē
方瑞娥Png Suī-ngôo
——————————————
以前農業的社會
í-tsîng lông-gia̍p ê siā-huē
厝邊頭尾逐家好做伙
tshù-pinn-thâu-bué ta̍k-ke hó tsò-hué
有閒親情朋友來相揣
ū-îng tshin-tsiânn pîng-iú lâi sio-tshuē
逐家鬥陣講笑詼
ta̍k-ke tàu-tīn kóng-tshiò-khue
若是啥人有困難
nā sī siánn-lâng ū khùn-lân
互相幫忙一句話
hōo-siong pang-bâng tsi̍t-kù uē
路頭路尾見面
lōo-thâu-lōo-bué kìnn-bīn
相借問
sio-tsioh-mn̄g
彼塊埔人啊你
hit-tè-poo lâng–ah lí
啊食飽矣未
ah tsia̍h-pá–ah buē
現在工業的社會
hiān-tsāi kang-gia̍p ê siā-huē
開喙都問起趁偌濟
khui-tshuì to mn̄g-khí thàn guā-tsē
有錢才有人來相揣
ū-tsînn tsiah ū-lâng lâi sio-tshuē
無錢佮人講無話
bô tsînn kah lâng kóng-bô uē
目睭看懸無看低
ba̍k-tsiu khuànn kuân bô khuànn kē
做人未免太超過
tsuè-lâng bī-bián thài tshiau-kuè
你看事業成功的前輩
lí khuànn sū-gia̍p sîng-kong ê tsiân-puè
攏是對人好禮
lóng-sī tuì lâng hó-lé
真賢慧
tsin hiân-huē
