奇萊山
《奇萊山》Kî-lâi-suann
張添榮Tiunn Thiam-îng
——————————————
又閣是落雨的暗暝
iū-koh sī lo̍h-hōo ê àm-mî
沉重跤步
tîm-tāng kha-pōo
寂寞的形影
tsi̍k-bo̍k ê hîng-iánn
烏雲罩霧
oo-hûn tà-bū
崁著箭竹林
khàm tio̍h tsìnn-tik-nâ
心事重重
sim-sū tiông-tiông
孤單行
koo-tuann kiânn
眼看奇萊山的孤影
gán-khàn Kî-lâi-suann ê koo iánn
寸步難行
tshùn-pōo lân-kiânn
咱著勇敢行
lán tio̍h ióng-kám kiânn
啊~奇萊山啊奇萊山
ah~ Kî-lâi-suann–ah Kî-lâi-suann
憂愁痛苦啥人擔
iu-tshiû thòng-khóo siánn-lâng tann
過了一山閣一嶺
kuè-liáu tsi̍t-suann koh tsi̍t-niá
行過性命高峰頂面的我
kiânn kuè sìnn-miā ko-hong tíng-bīn ê guá
面對人情的冷暖
bīn-tuì jîn-tsîng ê líng-luán
人生的悲歡
jîn-sing ê pi-huan
自古多情空遺憾
tsū-kóo to-tsîng khang uî-hām
啊~世間的情愛
ah~ sè-kan ê tsîng-ài
欲怎樣看破
beh tsuánn-iūnn khuànn-phuà
