阿母的目屎
《阿母的目屎》A-bú ê Ba̍k-sái
林涵霖Lîm Hâm-lîm
——————————————
阿母的目屎
a-bú ê ba̍k-sái
總是委屈吞落腹內
tsóng-sī uí-khut thun lo̍h pak-lāi
上煩惱序細來變歹
siōng huân-ló sī-sè lâi piàn pháinn
等到半暝了後
tán-kàu puànn-mî liáu-āu
偷偷拭目屎
thau-thau tshit ba̍k-sái
無論趁濟趁少不常在
bô-lūn thàn tsē thàn tsió put tshiâng-tsāi
跤踏實地才應該
kha ta̍h si̍t-tē tsiah ing-kai
阿母的心內偌苦
a-bú ê sim-lāi guā khóo
你敢知
lí kám tsai
等你手抱孩兒
tán lí tshiú phō hâi-jî
就了解
tsiū liáu-kái
你愛趕緊振作起來
lí ài kuánn-kín tsín-tsok–khí-lâi
予老母咧操心不應該
hōo lāu-bú teh tshau-sim put-ing-kai
失去阿母
sit-khì a-bú
用金錢買袂轉來
iōng kim-tsînn bé buē tńg–lâi
