思雙枝
《思雙枝》Su-siang-ki
農村武裝青年樂團 Lông-tshuan Bú-tsong Tshing-liân Ga̍k-thuân
——————————————
彼思啊雙欸枝
he su–ah siang–eh ki
佇咧五十年前的彼當啊時
tī-leh gōo-tsa̍p nî tsîng ê hit-tong–ah sî
一位民謠歌手
tsi̍t uī bîn-iâu kua-tshiú
是蓋啊傳啊奇噯喲喂
sī kài–ah thuân–ah kî–aih-ioh-uê
伊自編自唱啊恆春調欸
i tsū-pian tsū-tshiùnn–ah Hîng-tshun-tiāu–eh
伊手彈月琴
i tshiú tuânn gue̍h-khîm
來唱啊民啊謠噯喲喂
lâi tshiùnn–ah bîn–ah iâu–aih-ioh-uê
彼思啊雙欸枝
he su–ah siang–eh ki
這條思雙枝
tsit tiâu su-siang-ki
是上啊出啊名欸
sī siōng–ah tshut–ah miâ–eh
唱出阿遠佮阿發仔
tshiùnn-tshut A-uán kah A-huat–á
悲慘的心啊情噯喲喂
pi-tshám ê sim–ah tsiânn–aih-ioh-uê
伊一路對恆春
i tsi̍t-lōo tuì Hîng-tshun
來唱到臺北城欸
lâi tshiùnn kàu Tâi-pak-siânn–eh
紅目達仔
Âng-ba̍k-ta̍t-á
講是啊伊的名噯喲喂
kóng sī–ah i ê miâ–aih-ioh-uê
彼思啊雙欸枝
he su–ah siang–eh ki
民謠是母親啊
bîn-iâu sī bú-tshin–ah
是土地的心聲欸
sī thóo-tē ê sim-siann–eh
流著祖先的血汗
lâu tio̍h tsóo-sian ê hueh-kuānn
共咱啊晟噯喲喂
kā lán–ah tshiânn–aih-ioh-uê
彼思啊雙欸枝
he su–ah siang–eh ki
咱著大聲
lán tio̍h tuā-siann
來唱出咱的名欸
lâi tshiùnn-tshut lán ê miâ–eh
來唱出臺灣民謠的
lâi tshiùnn-tshut Tâi-uân bîn-iâu ê
新啊性命噯喲喂
sin–ah sìnn-miā–aih-ioh-uê
