食齋來唸佛
《食齋來唸佛》Tsia̍h-tse Lâi Liām-pu̍t
侯美儀Hâu Bí-gî(馬來西亞)
——————————————
阿娘欸你行路直直行
a-niû–eh lí kiânn-lōo ti̍t-ti̍t kiânn
毋通越頭等恁阿兄
m̄-thang ua̍t-thâu tán lín a-hiann
恁兄若是無某
lín hiann nā-sī bô bóo
是天啊註定
sī thinn–ah tsù-tiānn
毋敢佮你做陣行
m̄-kánn kah lí tsuè-tīn kiânn
講啊緣投
kóng–ah iân-tâu
阮比別人贏透透
gún pí pa̍t-lâng iânn thàu-thàu
命運是佮咱做對頭
miā-ūn sī kah lán tsuè tuì-thâu
敧敧硞硞敧敧硞硞
khi-khi-kho̍k-kho̍k khi-kh-kho̍k-kho̍k
阿彌陀佛阿彌陀佛
Oo-mí-tôo-hu̍t Oo-mí-tôo-hu̍t
看破
khuànn-phuà
食齋來唸佛
tsia̍h-tse lâi liām-pu̍t
阿娘欸你行路倚路行
a-niû–eh lí kiânn-lōo uá-lōo kiânn
毋通徛咧等恁阿兄
m̄-thang khiā leh tán lín a-hiann
恁兄若是無某
lín hiann nā-sī bô bóo
無大厝佮大車
bô tuā-tshù kah tuā-tshia
毋敢共你講心聲
m̄-kánn kā lí kóng sim-siann
講啊前途
kóng–ah tsiân-tôo
阮比別人有出頭
gún pí pa̍t-lâng ū tshut-thâu
可惜是命運做對頭
khó-sioh sī miā-ūn tsuè tuì-thâu
敧敧硞硞敧敧硞硞
khi-khi-kho̍k-kho̍k khi-kh-kho̍k-kho̍k
阿彌陀佛阿彌陀佛
Oo-mí-tôo-hu̍t Oo-mí-tôo-hu̍t
看破
khuànn-phuà
食齋來唸佛
tsia̍h-tse lâi liām-pu̍t
