勸恁毋通食軟飯
《勸恁毋通食軟飯》Khǹg Lín M̄-thang Tsia̍h Nńg-pn̄g
陳金浪Tân Kim-lōng(新加坡)
——————————————
身穿破衫乞食裝
sin tshīng phuà-sann khit-tsia̍h tsong
行過紅燈吹海風
kiânn kuè âng-ting tshe hái-hong
手攑一个管
tshiú gia̍h tsi̍t-ê kóng
共恁叫哆琅
kā lín kiò to-lông
我三日無食頭楞楞
guá sann-ji̍t bô tsia̍h thâu gông-gông
專望頭家公
tsuan bōng thâu-ke-kong
望恁會哆琅
bāng lín ē to-lông
五占一角抌落管
gōo-tsiam tsi̍t-kak tìnn lo̍h kóng
阮永遠會感激你
gún íng-uán ē kám-kik lí
啊~感謝頭家恁的哆琅
ah~ kám-siā thâu-ke lín ê to-lông
草蓆鋪落坐塗跤
tsháu-tshio̍h phoo–lo̍h tsē thôo-kha
手攑一支破吉他
tshiú gia̍h tsi̍t-ki phuà gì-tah
一路來彈歌
tsi̍t-lōo lâi tuânn kua
一爿來唱歌
tsi̍t-pîng lâi tshiùnn-kua
恁聽我唱出流浪歌
lín thiann guá tshiùnn-tshut liû-lōng kua
啥人會知影
siánn-lâng ē tsai-iánn
心內的孤單
sim-lāi ê koo-tuann
我頭眩破病無人看
guá thâu hîn phuà-pīnn bô-lâng khuànn
目屎流落滿塗跤
ba̍k-sái lâu-lo̍h muá thôo-kha
啊~天涯海角我揣生活
ah~ thian-gâi hái-kak guá tshē sing-ua̍h
想起家己的命理
siūnn-khí ka-kī ê miā-lí
心肝愈想愈傷悲
sim-kuann jú siūnn jú siong-pi
毋知等何時
m̄-tsai tán hô-sî
有出頭的日子
ū tshut-thâu ê ji̍t-tsí
我四界流浪無捨施
guá sì-kuè liû-lōng bô-siá-si
毋是阮歡喜
m̄-sī gún huann-hí
流浪踮街邊
liû-lōng tiàm kue-pinn
完全是環境來所致
uân-tsuân sī khuân-kíng lâi sóo-tì
聽我唱完這歌詩
thiann guá tshiùnn uân tse kua-si
啊~怨嘆我這个歹囝兒
ah~ uàn-thàn guá tsit ê pháinn-kiánn-jî
