閣揣有別个
《閣揣有別个》Koh Tshuē Ū Pa̍t-ê
白文文Pe̍h Bûn-bûn
——————————————
以為已經
í-uî í-king
已經將你來壓落底
í-king tsiong lí lâi ah lo̍h-té
誰知誰知
siáng tsai siáng tsai
你偷偷閣愛別个
lí thau-thau koh ài pa̍t-ê
面頭前激甲真好禮
bīn-thâu-tsîng kik kah tsin hó-lé
尻脊後你是一个歪喙雞
kha-tsiah-āu lí sī tsi̍t-ê uai-tshuì-ke
算我有較戇
sǹg guá ū khah gōng
我有較衰
guá ū khah sue
予你騙甲戇戇踅
hōo lí phiàn kah gōng-gōng se̍h
你毋免聳鬚
lí m̄-bián tshàng-tshiu
你毋免齴牙
lí m̄-bián giàng-gê
親像你這款窒倒街
tshin-tshiūnn lí tsit khuán that-tó-ke
目睭共激予花花
ba̍k-tsiu kā kik hōo hue-hue
閣揣閣揣閣揣
koh tshuē koh tshuē koh tshuē
閣揣也比你好幾若倍
koh tshuē iā pí lí hó kuí-lō puē
