你害人
《你害人》Lí Hāi Lâng
曾朝宗Tsan Tiâu-tsong
——————————————
想昔日雙人情深意重
siūnn sik-ji̍t siang-lâng tsîng tshim ì tāng
歡喜快樂過著青春夢
huann-hí khuài-lo̍k kuè tio̍h tshing-tshun bāng
誰知你交金錢
siáng tsai lí kau kim-tsînn
離開阮身邊
lī-khui gún sin-pinn
將愛送去予別人
tsiong ài sàng-khì hōo pa̍t-lâng
我的希望
guá ê hi-bāng
你共我疼痛
lí kā guá thiànn-thàng
無疑你放捒阮
bô-gî lí pàng-sak gún
害阮來絕望
hāi gún lâi tsua̍t-bāng
啊~你害人你害人
ah~ lí hāi lâng lí hāi lâng
害阮消瘦毋成人
hāi gún siau-sán m̄-tsiânn-lâng
料想是會來結成連理
liāu-sióng sī ē lâi kiat-sîng liân-lí
誰知晴天霹靂烏雲天
siáng tsai tsîng-thian phik-li̍k oo-hûn thinn
綿綿好情意
mî-mî hó tsîng-ì
煞來拆分離
suah lâi thiah hun-lî
予阮不覺珠淚滴
hōo gún put-kak tsu-luī tih
毋想你
m̄ siūnn lí
偏偏又來想起
phian-phian iū lâi siūnn-khí
這款的日子
tsit khuán ê ji̍t-tsí
怎會活落去
tsuánn ē ua̍h–lo̍h-khì
啊~你害人你害人
ah~ lí hāi lâng lí hāi lâng
害阮消瘦毋成人
hāi gún siau-sán m̄-tsiânn-lâng
一場的美夢已經過去
tsi̍t-tiûnn ê bí-bāng í-king kuè–khì
怎樣較想猶原也是你
tsuánn-iūnn khah siūnn iu-guân iā-sī lí
雖然是斷了情
sui-jiân sī tuān liáu tsîng
猶原心頭凝
iu-guân sim-thâu gîng
想著心酸跤手軟
siūnn-tio̍h sim sng kha-tshiú nńg
我的真情
guá ê tsin-tsîng
為你來犧牲
uī lí lâi hi-sing
若毋是愛你遮深
nā m̄-sī ài lí tsiah tshim
哪會變痴情
ná ē piàn tshi-tsîng
啊~你害人你害人
ah~ lí hāi lâng lí hāi lâng
害阮消瘦毋成人
hāi gún siau-sán m̄-tsiânn-lâng
