女兒
《女兒》Lú-jî
陳秋山Tân Tshiu-san
——————————————
你毋知是啥款的運命
lí m̄-tsai sī siánn-khuán ê ūn-miā
你來做我的查某囝
lí lâi tsuè guá ê tsa-bóo-kiánn
緣份牽來牽去
iân-hūn khan-lâi-khan-khì
出世踮這个家
tshut-sì tiàm tsit ê ka
看著你的笑容
khuànn-tio̍h lí ê tshiò-iông
我的心就慢慢仔定
guá ê sim tiō bān-bān-á tiānn
教你講話
kà lí kóng-uē
牽你學行
khan lí o̍h-kiânn
陪你細膩騎著跤踏車
puê lí sè-jī khiâ tio̍h kha-ta̍h-tshia
這个時陣
tsit ê sî-tsūn
爸爸的心上快活
pá-pah ê sim siōng khuìnn-ua̍h
看你一日一日大
khuànn lí tsi̍t-ji̍t-tsi̍t-ji̍t tuā
知影人的心
tsai-iánn lâng ê sim
一半美麗
tsi̍t-puànn bí-lē
一半歹看
tsi̍t-puànn pháinn-khuànn
長長的人生路
tn̂g-tn̂g ê jîn-sing lōo
袂當攏陪你行
buē-tàng lóng puê lí kiânn
希望永遠袂改變
hi-bāng íng-uán buē kái-piàn
是你溫柔的心肝
sī lí un-jiû ê sim-kuann
應該毋是一場意外
ing-kai m̄-sī tsi̍t-tiûnn ì-guā
我來做你的爸爸
guá lâi tsuè lí ê pá-pah
情份欠來欠去
tsîng-hūn khiàm-lâi-khiàm-khì
該還的袂當拖
kai hîng–ê bē-tàng thua
講著你的心情
kóng-tio̍h lí ê sim-tsîng
我的心就恬恬仔聽
guá ê sim tiō tiām-tiām-á thiann
做陣山
tsuè-tīn peh-suann
相招唱歌
sio-tsio tshiùnn-kua
陪你讀冊
puê lí tha̍k-tsheh
做伙看電影
tsuè-hué khuànn tiān-iánn
這个時陣
tsit ê sî-tsūn
爸爸的心上開闊
pá-pah ê sim siōng khui-khuah
歲數一年一年加
huè-sòo tsi̍t-nî-tsi̍t-nî ka
過去的理想
kuè-khì ê lí-sióng
一半堅持
tsi̍t-puànn kian-tshî
一半看破
tsi̍t-puànn khuànn-phuà
爸爸的人生路
pá-pah ê jîn-sing lōo
你毋是攏知影
lí m̄-sī lóng tsai-iánn
但是永遠袂改變
tān-sī íng-uán buē kái-piàn
對你溫柔的心肝
tuì lí un-jiû ê sim-kuann
看你一日一日大
khuànn lí tsi̍t-ji̍t-tsi̍t-ji̍t tuā
知影人的心
tsai-iánn lâng ê sim
一半美麗
tsi̍t-puànn bí-lē
一半歹看
tsi̍t-puànn pháinn-khuànn
長長的人生路
tn̂g-tn̂g ê jîn-sing lōo
袂當攏陪你行
buē-tàng lóng puê lí kiânn
希望永遠袂改變
hi-bāng íng-uán buē kái-piàn
是你溫柔的心肝
sī lí un-jiû ê sim-kuann
