唯一的牽掛
《唯一的牽掛》Uî-it ê Khian-kuà
陳雪玲Tân Suat-lîng(泉州)
——————————————
日頭落山
ji̍t-thâu lo̍h-suann
目睭金金仔看
ba̍k-tsiu kim-kim-á khuànn
這个門口埕
tsit ê mn̂g-kháu-tiânn
為何看無你的形影
uī-hô khuànn-bô lí ê hîng-iánn
阿嬰心肝
a-inn sim-kuann
已經聽袂著你叫阮的名
í-king thiann buē-tio̍h lí kiò gún ê miâ
彼間老厝瓦
hit king lāu tshù-hiā
予阮的幸福滿滿
hōo gún ê hīng-hok muá-muá
這條歌
tsit tiâu kua
阮欲唱予你聽
gún beh tshiùnn hōo lí thiann
看著生鉎的三輪車
khuànn-tio̍h sinn-san ê sann-lûn-tshia
目屎流袂煞
ba̍k-sái lâu buē-suah
這是阿媽留予我
tse sī a-má lâu hōo guá
唯一的牽掛
uî-it ê khian-kuà
毋甘予阮行
m̄-kam hōo gún kiânn
毋甘予阮流一滴汗
m̄-kam hōo gún lâu tsi̍t-tih kuānn
這條歌
tsit tiâu kua
阮欲唱予你聽
gún beh tshiùnn hōo lí thiann
你上掛念彼个人
lí siōng kuà-liām hit ê lâng
這馬已經長大
tsit-má í-king tióng-tuā
伊嘛做人的某囝
i mā tsuè lâng ê bóo-kiánn
做人的媽媽
tsuè lâng ê má-mah
伊會照你的教示
i ē tsiàu lí ê kà-sī
好好生活
hó-hó sing-ua̍h
