社會勸世歌
《社會勸世歌》Siā-huē Khuàn-sè-kua
陳金浪Tân Kim-lōng(新加坡)
——————————————
踮在哪世間啊哩嘟
tiàm-tsāi–nah sè-kan–ah-lih-toh
是海海喔
sī hái-hái–ooh
好歹總是天安排喔
hó-pháinn tsóng–sī thinn an-pâi–ooh
做人啊毋通啊哩嘟
tsuè-lâng–ah m̄-thang–ah-lih-toh
亂亂來喔
luān-luān-lâi–ooh
愛慕虛榮不應該喔
ài-bōo hi-êng put-ing-kai–ooh
看人哪有錢啊哩嘟
khuànn lâng–nah ū-tsînn–ah-lih-toh
免怨嘆喔
bián uàn-thàn–ooh
為著生活著愛趁喔
uī-tio̍h sing-ua̍h tio̍h-ài thàn–ooh
加減啊收入啊哩嘟
ke-kiám–ah siu-ji̍p–ah-lih-toh
較袂散喔
khah buē sàn–ooh
毋通做彼號貧惰人喔
m̄-thang tsuè hit-lō pîn-tuānn-lâng–ooh
啉酒來逍遙啊哩嘟
lim-tsiú lâi siau-iâu–ah-lih-toh
人人愛喔
lâng-lâng ài–ooh
毋通哪為酒來失敗喔
m̄-thang–nah uī tsiú lâi sit-pāi–ooh
風流的查某啊哩嘟
hong-liû ê tsa-bóo–ah-lih-toh
真厲害喔
tsin lī-hāi–ooh
千萬毋啊通亂亂來喔
tshian-bān m̄–ah thang luān-luān-lâi–ooh
毋通哪失戀啊哩嘟
m̄-thang–nah sit-luân–ah-lih-toh
來嘆聲喔
lâi thàn-siann–ooh
提出著勇氣來拍拚喔
the̍h tshut tio̍h ióng-khì lâi phah-piànn–ooh
毋免啊較苦仔哩嘟
m̄-bián–ah khah-khóo-á–lih-toh
求親情喔
kiû tshin-tsiânn–ooh
因緣總是天註定喔
in-iân tsóng–sī thinn tsù-tiānn–ooh
朋友哪做陣啊哩嘟
pîng-iú–nah tsuè-tīn–ah-lih-toh
免計較喔
bián kè-kàu–ooh
互相來幫助做予伊到喔
hōo-siong lâi pang-tsōo tsuè hōo i kàu–ooh
希望啊大家啊哩嘟
hi-bāng–ah tāi-ke–ah-lih-toh
好日後喔
hó ji̍t-āu–ooh
永遠永遠好到老喔
íng-uán íng-uán hó kàu lāu–ooh
爸母哪疼囝啊哩嘟
pē-bú–nah thiànn kiánn–ah-lih-toh
是天性喔
sī thian-sìng–ooh
夫妻和好相同情喔
hu-tshe hô-hó sio tông-tsîng–ooh
兄弟啊冤家啊哩嘟
hiann-tī–ah uan-ke–ah-lih-toh
無路用喔
bô-lōo-īng–ooh
家庭和氣萬事成喔
ka-tîng hô-khì bān-sū sîng–ooh
