啥!八月二三欲公投?啊是欲投啥物代?
《啥!八月二三欲公投?啊是欲投啥物代?》
Siánn! Peh-gue̍h Jī-sann Beh Kong-tâu? Ah Sī Beh Tâu Siánn-mih Tāi?
陳珍儀Tân Tin-gî
——————————————
八月二三欲公投
peh-gue̍h jī-sann beh kong-tâu
無閒了解閣看袂透
bô-îng liáu-kái koh khuànn buē-thàu
逐家暫且歇睏免幌頭
ta̍k-ke tsiām-tshiánn hioh-khùn bián hàinn-thâu
聽我唸歌恁毋通走
thiann guá liām-kua lín m̄-thang tsáu
核能三廠佇恆春
hi̍k-lîng sann-tshiúnn tī Hîng-tshun
起佇斷層頂面是無安穩
khí tī tn̄g-tsân tíng-bīn sī bô an-ún
四十冬來眾神來賜恩
sì-tsa̍p-tang lâi tsiòng-sîn lâi sù-un
今年五月總算來停睏
kin-nî gōo–gue̍h tsóng-sǹg lâi thîng-khùn
舊年核能發電只有四葩
kū-nî hi̍k-lîng huat-tiān tsí-ū sì-pha
今年咱成做無核電的國家
kin-nî lán tsiânn-tsò bô hi̍k-tiān ê kok-ka
無用核電對五月到今
bô iōng hi̍k-tiān tuì gōo–gue̍h kàu-tann
電量不時有賰超過一成
tiān-liōng put-sî ū-tshun tshiau-kuè tsi̍t-siânn
美國捌重新發動四十年老廠
Bí-kok bat tiông-sin huat-tōng sì-tsa̍p-nî lāu tshiúnn
三千九百億的成本毋成樣
sann-tshing káu-pah-ik ê sîng-pún m̄-tsiânn-iūnn
若重啟核三廠諸位你共想
nā tiông-khé hi̍k-sam-tshiúnn tsu-uī lí kā siūnn
黃金璇石咱著愛攢幾箱
n̂g-kim suān-tsio̍h lán to̍h-ài tshuân kuí-siunn
若欲重新發動愛開幾若冬
nā beh tiông-sin huat-tōng ài khai kuí-nā tang
用五年凡勢都無法度振動
iōng gōo-nî huān-sè to bô-huat-tōo tín-tāng
因為核能廢料處理捎無摠
in-uī hi̍k-lîng huì-liāu tshú-lí sa-bô-tsáng
危害囝孫性命是毋通
guî-hāi kiánn-sun sènn-miā sī m̄-thang
空氣汙染佮核能無牽連
khong-khì u-jiám kah hi̍k-lîng bô khan-liân
愛靠防治法令佮綠電
ài khò hông-tī-huat-līng kah li̍k-tiān
永續能源愛沓沓仔發展
íng-sio̍k lîng-guân ài ta̍uh-ta̍uh-á huat-tián
難題若留予後代咱傷落臉
lān-tê nā lâu hōo hiō-tāi lán siunn làu-lián
中國不時唱聲講欲共咱拍
Tiong-kok put-sî tshiàng-siann kóng beh kā lán phah
大型的電廠欲共藏去佗
tuā-hîng ê tiān-tshiúnn beh kā tshàng khì tah
核能電廠向時若有重耽
hi̍k-lîng tiān-tshiúnn hiàng-sî nā ū tîng-tânn
地獄的災難毋是共恁嚇
tē-ga̍k ê tsai-lān m̄-sī kā lín hánn
政客立場前後顛倒反
tsìng-kheh li̍p-tiûnn tsîng-āu tian-tò-píng
用權勢修改核能法令
iōng khuân-sè siu-kái hi̍k-lîng huat-līng
無顧咱的性命與家庭
bô-kòo lán ê sènn-miā í ka-tîng
開十一億公投意義不明
khai tsa̍p-it-ik kong-tâu ì-gī put-bîng
核能一廠二廠佇新北市
hi̍k-lîng it-tshiúnn jī-tshiúnn tī Sin-pak-tshī
停睏閣愛處理二十年
thîng-khùn koh ài tshú-lí jī-tsa̍p nî
閣想欲予屏東陷入危機
koh siūnn-beh hōo Pîn-tong hām-ji̍p guî-ki
咱袂當自私自利無公義
lán bē-tàng tsū-su tsū-lī bô kong-gī
管待政客逐工咧搬戲
kuán-thāi tsìng-kheh ta̍k-kang teh puann-hì
八月二三的公投日
peh-gue̍h jī-sann ê kong-tâu-ji̍t
咱嘛是愛有注意
lán mā sī ài ū tsù-ì
重啟核三
tiông-khé hi̍k-sann
頓無同意
tǹg bô tông-ì
