手巾仔歌
《手巾仔歌》Tshiú-kin-á Kua
梅家君Muî Ka-kun
——————————————
一條手巾繡啊鴛鴦
tsi̍t-tiâu tshiú-kin siù–ah uan-iunn
送予阿君仔做伴手
sàng hōo a-kun–á tsuè phuānn-tshiú
希望阿君仔愛主張
hi-bāng a-kun–á ài tsú-tiunn
噯唷!千萬毋通烏白想
aih-iooh! tshian-bān m̄-thang oo-pe̍h siūnn
兩條手巾繡啊花欉喔
nn̄g-tiâu tshiú-kin siù–ah hue-tsâng–ooh
欲送阿君仔有情人
bueh sàng a-kun–á ū-tsîng-lâng
毋通迎新舊啊來放
m̄-thang ngiâ sin kū–ah lâi pàng
噯唷!予人料著毋啊是人
aih-iooh! hōo-lâng liāu–tio̍h m̄–ah sī lâng
三條手巾繡啊龍蝦
sann-tiâu tshiú-kin siù–ah liông-hê
欲送阿君仔少年家
bueh sàng a-kun–á siàu-liân-ke
阿君仔厲害兩句話
a-kun–á lī-hāi nn̄g-kù uē
噯唷!叫阮怎樣袂痴迷
aih-iooh! kiò gún tsuánn-iūnn buē tshi-bê
四條手巾繡啊金魚
sì-tiâu tshiú-kin siù–ah kim-hî
欲送阿君仔做憑據
bueh sàng a-kun–á tsuè pîng-kì
阿君仔對阮好情義
a-kun–á tuì gún hó tsîng-gī
噯唷!就是按呢相信伊
aih-iooh! tiō-sī án-ne siong-sìn i
五條手巾繡啊帆船
gōo-tiâu tshiú-kin siù–ah phâng-tsûn
阿君仔僥心一時陣
a-kun–á hiau-sim tsi̍t-sî-tsūn
無疑好天起烏雲
bô-gî hó-thinn khí oo-hûn
噯唷!目屎流落做飯吞
aih-iooh! ba̍k-sái lâu–lo̍h tsuè pn̄g thun
六條手巾繡啊花鳥
la̍k-tiâu tshiú-kin siù–ah hue-tsiáu
無疑阿君仔你先僥
bô-gî a-kun–á lí sing hiau
滿腹苦情講啊袂了
muá-pak khóo-tsîng kóng–ah buē-liáu
噯唷!心酸重重怎樣消
aih-iooh! sim sng tîng-tîng tsuánn-iūnn siau
騙人的愛情
phiàn lâng ê ài-tsîng
毋啊是人喔
m̄–ah sī lâng–ooh
無情無義採啊花蜂
bô-tsîng bô-gī tshái–ah hue-phang
恨阮對伊情義重
hūn gún tuì i tsîng-gī tāng
噯唷!到尾食虧阮啊一人
aih-iooh! kah-bué tsia̍h-khui gún–ah tsi̍t-lâng
坐著火車啊轉啊來去喔
tsē tio̍h hué-tshia–ah tńg–ah lâi-khì–ooh
一點五分到嘉義
tsi̍t-tiám gōo-hun kàu Ka-gī
臺北的查埔我上氣
Tâi-pak ê tsa-poo guá siōng khì
噯唷!我恨阿君仔無情義
aih-iooh! guá hūn a-kun–á bô tsîng-gī
