偷食魚
《偷食魚》Thau-tsia̍h Hî
張雅淳Tiunn Ngá-sûn
——————————————
貓咪貓咪愛食魚
niau-mi niau-mi ài tsia̍h hî
看著桌頂一尾魚
khuànn-tio̍h toh-tíng tsi̍t-bué hî
芳酥芳酥好滋味
phang-soo phang-soo hó tsu-bī
鼻著喙瀾㴙㴙滴
phīnn-tio̍h tshuì-nuā tsha̍p-tsha̍p-tih
轉來踅去目睭仁
tńg-lâi-se̍h-khì ba̍k-tsiu-jîn
看攏無人來注意
khuànn lóng bô-lâng lâi tsù-ì
一下跳上飯桌頂
tsi̍t-ē thiàu-tsiūnn pn̄g-toh tíng
閣再偷看四周圍
koh-tsài thau-khuànn sì-tsiu-uî
阿母灶跤炒肉絲
a-bú tsàu-kha tshá bah-si
阿爸門口唸歌詩
a-pah mn̂g-kháu liām kua-si
大姊二姊看電視
tuā-tsé jī-tsé khuànn tiān-sī
無人有閒來注意
bô-lâng ū-îng lâi tsù-ì
貓咪一喙去咬魚
niau-mi tsi̍t-tshuì khì kā hî
雄雄哀叫niau-niau-hinn
hiông-hiông ai-kiò niau-niau-hinn
逐家趕緊看貓咪
ta̍k-ke kuánn-kín khuànn niau-mi
才知貪食燙著舌
tsiah tsai tham-tsia̍h thǹg-tio̍h tsi̍h
