樂觀的小姐
《樂觀的小姐》Lo̍k-kuan ê Sió-tsiá
馬沙Má-sa
——————————————
雖然是
sui-jiân-sī
阮的家庭自早散赤
gún ê ka-tîng tsū-tsá sàn-tshiah
毋過我
m̄-koh guá
袂得怨嘆阮是歹命
buē-tit uàn-thàn gún sī pháinn-miā
嘿!每日透早陪爸爸
heh! muí-ji̍t thàu-tsá puê pá-pah
捒著一台三輪車
sak tio̍h tsi̍t-tâi sann-lián-tshia
踮在市場咧拍拚
tiàm-tsāi tshī-tiûnn teh phah-piànn
捒甲汗水流袂定
sak kah kuānn-tsuí lâu buē tiānn
有時捒甲捒袂行
ū-sî sak kah sak buē kiânn
對阮也是無想討厭
tuì gún iā-sī bô siūnn thó-ià
好!歡歡喜喜
hó! huann-huann-hí-hí
唱出著快樂的人生
tshiùnn-tshut tio̍h khuài-lo̍k ê jîn-sing
活潑的歌聲
ua̍h-phuat ê kua-siann
我雖然踮在市場
guá sui-jiân tiàm-tsāi tshī-tiûnn
牽三輪車
khan sann-lián-tshia
毋過我踮佇遮
m̄-koh guá tiàm tī tsia
相當出名
siong-tong tshut-miâ
嘿!媒人直直行袂煞
heh! hm̂-lâng ti̍t-ti̍t kiânn buē-suah
也有真濟阿狗兄
iā ū tsin tsuē a-káu-hiann
想欲招我做舞伴
siūnn-bueh tsio guá tsuè bú-phuānn
有時風流的老爺
ū-sî hong-liû ê lāu-iâ
也欲招我走舞廳
iā bueh tsio guá tsáu bú-thiann
講我若是愛一聲
kóng guá nā-sī ài–tsi̍t-siann
好!閣有別莊通好徛
hó! koh ū pia̍t-tsong thang-hó khiā
這款的人生
tsit khuán ê jîn-sing
敢會偌歹命
kám ē guā pháinn-miā
