愛某毋通叫艱苦
《愛某毋通叫艱苦》Ài Bóo M̄-thang Kiò Kan-khóo
康丁Khong-ting(張錫圭Tiunn Sik-kui)
——————————————
少年的痟娶某
siàu-liân–ê siáu tshuā-bóo
愛某你毋通叫艱苦
ài bóo lí m̄-thang kiò kan-khóo
若是娶著彼號刺查某
nā sī tshuā-tio̍h hit-lō tshiah-tsa-bóo
尻脊著準備做大鼓
ka-tsiah tio̍h tsún-pī tsuè tuā-kóo
若是娶著彼號三八某
nā sī tshuā-tio̍h hit-lō sam-pat bóo
保證你氣甲大腹肚
pó-tsìng lí khì kah tuā-pak-tóo
若是娶著彼號近視某
nā sī tshuā-tio̍h hit-lō kūn-sī bóo
彼〇鬚閣當做大菜脯
he ?-tshiu koh tòng-tsuè tuā tshài-póo
彼世間的查某是百百款
he sè-kan ê tsa-bóo sī pah-pah-khuán
也有肥的閣也有瘦
iā ū puî–ê koh iā ū sán
也有躼甲是像竹篙喔
iā ū lò kah sī tshiūnn tik-ko–ooh
講話長長閣𠢕囉嗦
kóng-uē tn̂g-tn̂g koh gâu lo-so
也有生做是矮矮矮
iā ū sinn-tsuè sī ué-ué-ué
彼七刺五耙閣上𠢕詈
he tshit-tshiah-gōo-pê koh siōng gâu lué
也有媠甲閣親像花喔
iā ū suí kah koh tshin-tshiūnn hue–ooh
也有䆀甲閣像苦瓜
iā ū bái kah koh tshiūnn khóo-kue
也有勇甲是敢若牛
iā ū ióng kah sī kánn-ná gû
酒後性發閣上𠢕挐
tsiú āu sìng huat koh siōng gâu lû
也有歹銅欲假金花
iā ū pháinn-tâng beh ké kim-hue
閹雞欲趁鳳飛
iam-kue beh thàn hōng pue
也有一箍欲用兩箍
iā ū tsi̍t-khoo beh īng nn̄g-khoo
無錢才放咧面反烏
bô tsînn tsiah pàng teh bīn huán-oo
也有食老閣毋認老
iā ū tsia̍h-lāu koh m̄-jīn lāu
喙齒標標閣上愛操
tshuì-khí pio-pio koh siōng ài tshau
也有生做閣愛算命
iā ū sinn-tsuè koh ài sǹg-miā
銀票像紙閣提起來掖
gûn-phiò tshiūnn tsuá koh the̍h khí-lâi iā
也有一工是妝媠媠
iā ū tsi̍t-kang sī tsng suí-suí
彼做人上枵鬼
he tsuè-lâng siōng iau-kuí
也有看懸閣無看低
iā ū khuànn kuân koh bô khuànn kē
看彼號个散赤的閣無目地
khuànn hit-lō sàn-tshiah–ê koh bô-ba̍k-tē
也有念經閣食早菜
iā ū liām-king koh tsia̍h tsá-tshài
做人上慈愛
tsuè-lâng siōng tsû-ài
也有串學彼號空手道
iā ū tshuàn o̍h hit-lō khang-tshiú-tō
拍翁拳頭閣像落雨
phah ang kûn-thâu koh tshiūnn lo̍h-hōo
也有目睭閣激怐怐
iā ū ba̍k-tsiu koh kik-khòo-khòo
做人𠢕食醋
tsuè-lâng gâu tsia̍h-tshòo
彼無某真艱苦
he bô bóo tsin kan-khóo
衫破無人補
sann phuà bô-lâng póo
娶某目睭著捎予金
tshuā-bóo ba̍k-tsiu tio̍h sa hōo kim
毋通苦湯捀起來啉
m̄-thang khóo-thng phâng khí-lâi lim
希望恁會當娶好某
hi-bāng lín ē-tàng tshuā hó-bóo
一个好某
tsi̍t-ê hó-bóo
較贏三个天公祖
khah-iânn sann-ê Thinn-kong-tsóo
