嘆一聲
《嘆一聲》Thàn Tsi̍t-siann
偉哥Uí-ko
——————————————
一頓飯煮規暗
tsi̍t-tǹg pn̄g tsú kui-àm
才想起過去彼个人
tsiah siūnn-khí kuè-khì hit ê lâng
夜夜燒頓頓芳
iā-iā sio tǹg-tǹg phang
日日春一場夢
ji̍t-ji̍t tshun tsi̍t-tiûnn bāng
敢是我有福袂曉享
kám-sī guá ū hok buē-hiáu hiáng
一暝被冷規暗
tsi̍t-mî phuē líng kui-àm
才想起無緣彼个人
tsiah siūnn-khí bô-iân hit ê lâng
夜夜纏暝暝攬
iā-iā tînn mî-mî lám
聲聲君
siann-siann kun
一場空
tsi̍t-tiûnn khang
敢是我毋知伊輕重
kám-sī guá m̄-tsai i khin-tāng
一段情哭規暗
tsi̍t-tuānn tsîng khàu kui-àm
才想起心愛彼个人
tsiah siūnn-khí sim-ài hit ê lâng
夜夜甜手共放
iā-iā tinn tshiú kā pàng
句句話越耳空
kù-kù uē ua̍t hīnn-khang
敢是我花芳毋知紅
kám-sī guá hue phang m̄-tsai âng
一个人等規暗
tsi̍t-ê-lâng tán kui-àm
才想起惜別彼个人
tsiah siūnn-khí sioh-pia̍t hit ê lâng
夜夜想暝暝夢
iā-iā siūnn mî-mî bāng
日日揣
ji̍t-ji̍t tshuē
也無望
iā bô-bāng
敢是我將伊送別人
kám-sī guá tsiong i sàng pa̍t-lâng
一聲怨聲聲嘆
tsi̍t-siann uàn siann-siann thàn
嘆規暗
thàn kui-àm
為何天冷
uī-hô thinn líng
才賰被好攬
tsiah tshun phuē hó lám
