毋通亂拚
《毋通亂拚》M̄-thang Luān Piànn
俞隆華Jû Liông-huâ
——————————————
你若失敗
lí nā sit-pāi
毋免驚惶
m̄-bián kiann-hiânn
你若成功
lí nā sîng-kong
毋通袂記原來你是誰
m̄-thang buē-kì guân-lâi lí sī siáng
若是無人輸
nā sī bô-lâng su
你哪知影是你贏
lí ná tsai-iánn sī lí iânn
輸贏只不過自己定
su-iânn tsí-put-kò tsū-kí tiānn
做人千萬毋通亂亂拚
tsò-lâng tshian-bān m̄-thang luān-luān piànn
拚的意義愛知影
piànn ê ì-gī ài tsai-iánn
著愛注意顧名聲
tio̍h-ài tsù-ì kòo miâ-siann
著愛留路予人行
tio̍h-ài lâu lōo hōo-lâng kiânn
這才是成功的條件
tse tsiah-sī sîng-kong ê tiâu-kiānn
才袂枉費枉費
tsiah buē óng-huì óng-huì
做人的性命
tsò-lâng ê sìnn-miā
