懷念彼个無緣的
《懷念彼个無緣的》Huâi-liām Hit ê Bô-iân–ê
洪第七Âng Tē-tshit
——————————————
明知袂得相逢唷
bîng-tsai buē-tit siong-hông–iooh
心愛彼个唷
sim-ài hit-ê–iooh
猶原思戀著伊
iu-guân su-luân tio̍h i
心頭袂輕鬆
sim-thâu buē khin-sang
今夜又是雺霧
kim-iā iū sī bông-bū
罩著外面玻璃窗
tà tio̍h guā-bīn po-lê-thang
無人知阮輕重唷
bô-lâng tsai gún khin-tāng–iooh
加添心苦痛
ka-thiam sim khóo-thàng
加添心苦痛
ka-thiam sim khóo-thàng
想著目箍紅
siūnn-tio̍h ba̍k-khoo âng
明知相愛彼時唷
bîng-tsai siong-ài hit-sî–iooh
註定分離唷
tsù-tiānn hun-lî–iooh
偏偏思慕著伊
phian-phian su-bōo tio̍h i
心酸目屎滴
sim sng ba̍k-sái tih
霜風雖然悽冷
sng-hong sui-jiân tshi-líng
甘願孤單踮路邊
kam-guān koo-tuann tiàm lōo-pinn
懷念當初情意唷
huâi-liām tong-tshoo tsîng-ì–iooh
甜蜜初戀時
tinn-bi̍t tshoo-luân sî
甜蜜初戀時
tinn-bi̍t tshoo-luân sî
毋甘放袂記
m̄-kam pàng-buē-kì
明知為著將來唷
bîng-tsai uī-tio̍h tsiong-lâi–iooh
犧牲情愛唷
hi-sing tsîng-ài–iooh
因何偏偏閣來
in-hô phian-phian koh lâi
為伊變痴獃
uī i piàn tshi-gâi
月娘在阮心內
ge̍h-niû tsāi gún sim-lāi
雲閘月娘何時開
hûn tsa̍h ge̍h-niû hô-sî khai
運命由天安排唷
ūn-miā iû thinn an-pâi–iooh
痛苦愛忍耐
thòng-khóo ài jím-nāi
痛苦愛忍耐
thòng-khóo ài jím-nāi
只有真情愛
tsí-ū tsin tsîng-ài
