回頭是岸
《回頭是岸》Huê-thâu Sī Huānn
洪小凌Âng Sió-lîng(新加坡)
——————————————
款勸世人著做好代啊
khuán-khǹg sè-lâng tio̍h tsuè hó-tāi–ah
做歹做惡攏會害
tsuè-pháinn tsuè-ok lóng ē hāi
送入監牢關起來
sàng ji̍p kann-lô kuainn–khí-lâi
哎唷!監房痛苦啥人知
aih-ioh! kann-pâng thòng-khóo siánn-lâng tsai
監房內面是悽慘代啊
kann-pâng lāi-bīn sī tshinn-tshám tāi–ah
天猶未光著起來
thinn iáu-buē kng tio̍h khí-lâi
等候點名排規排
tán-hāu tiám-miâ pâi kui-pâi
哎唷!若毋聽話你就知
aih-ioh! nā m̄ thiann-uē lí tiō tsai
點名後提鋤頭啊
tiám-miâ āu the̍h–ah tî-thâu–ah
著去後山掘花草
tio̍h khì āu-suann ku̍t hue-tsháu
嘛有時陣著做廊溝
mā ū-sî-tsūn tio̍h tsò lông-kau
哎唷!做到滿身汗那流
aih-ioh! tsò kàu muá-sin kuānn ná lâu
無論起風抑是大雨到啊
bô-lūn khí-hong ia̍h-sī tuā-hōo kàu–ah
若無命令袂使走
nā bô bīng-līng buē-sái tsáu
毋管雙手攏起泡
m̄-kuán siang-tshiú lóng khí-phàu
哎唷!齒根咬牢嘛著忍到透
aih-ioh! khí-kun kā tiâu mā tio̍h lún kàu thàu
十二點到是食飯時啊
tsa̍p-jī-tiám kàu sī tsia̍h-pn̄g sî–ah
看著飯菜我喉就滇
khuànn-tio̍h pn̄g-tshài guá âu tiō tīnn
一碗白飯才幾湯匙
tsi̍t-uánn pe̍h-pn̄g tsiah kuí thng-sî
哎唷!無肉無魚配番薯
aih-ioh! bô bah bô hî phuè han-tsî
監房當鍊的所在啊
kann-pâng tng-liān ê sóo-tsāi–ah
每月只准探兩擺
muí gue̍h tsí tsún thàm nn̄g-pái
心肝茫茫咧等待
sim-kuann bâng-bâng teh tán-thāi
哎唷!等待某囝探監來
aih-ioh! tán-thāi bóo-kiánn thàm-kann lâi
探監的時才四个字啊
thàm-kann ê sî tsiah sì-ê jī–ah
未曾講話我目屎滴
bē-tsîng kóng-uē guá ba̍k-sái tih
某囝為我哭半死
bóo-kiánn uī guá khàu puànn-sí
哎唷!想著袂食閣睏袂去
aih-ioh! siūnn-tio̍h buē tsia̍h koh khùn buē-khì
勸咱朋友佮兄弟啊
khǹg lán pîng-iú kah hiann-tī–ah
千萬毋通做歹代誌
tshian-bān m̄-thang tsuè pháinn tāi-tsì
暗牌若掠你走袂離
àm-pâi nā lia̍h lí tsáu buē-lī
哎唷!回頭是岸著緊醒
aih-ioh! huê-thâu sī huānn tio̍h kín tshínn
