勇氣就是你的靠山
《勇氣就是你的靠山》Ióng-khì Tiō-sī Lí ê Khò-suann
林濬揚Lîm Tsùn-iông
——————————————
風起掖滿天沉重空氣
hong khí iā muá-thinn tîm-tāng khong-khì
暗淡夜無聲的三更
àm-tām iā bô-siann ê sann-kinn
疼是一種覺悟
thiànn sī tsi̍t-tsióng kak-gōo
認清錯誤面目
jīn-tshing tshò-gōo bīn-bo̍k
毋是放袂離的觸纏
m̄-sī pàng buē-lī ê tak-tînn
糊塗戇一時
hôo-tôo gōng tsi̍t-sî
總會覺醒
tsóng ē kak-tshínn
放蕩無了時
hòng-tōng bô-liáu-sî
枉費一生
óng-huì it-sing
傷悲袂當收回
siong-pi buē-tàng siu-huê
當初彼个決定
tong-tshoo hit ê kuat-tīng
哪通心懷疑
ná thang sim huâi-gî
後悔人生
hiō-hué jîn-sing
請你免驚
tshiánn lí bián-kiann
勇氣就是你的靠山
ióng-khì tiō-sī lí ê khò-suann
接受所有難關
tsiap-siū sóo-ū lân-kuan
擔任何輸贏
tam jīm-hô su-iânn
天地之間
thinn-tē tsi-kan
冷暖世界
líng-luán sè-kài
心著看破
sim tio̍h khuànn-phuà
重新行的路
tiông-sin kiânn ê lōo
每一步是堅強.
muí tsi̍t-pōo sī kian-kiông
