等你等規暝
《等你等規暝》Tán Lí Tán Kui-mî
依琳I-lîm
——————————————
踮佇四邊無人的暗暝
tiàm-tī sì-pinn bô-lâng ê àm-mî
攑頭看著
gia̍h-thâu khuànn-tio̍h
月娘伴天星
gue̍h-niû phuānn thinn-tshinn
想起心愛離開阮身邊
siūnn-khí sim-ài lī-khui gún sin-pinn
咱的山盟海誓走去覕
lán ê san-bîng hái-sè tsáu-khì bih
甜言蜜語變無味
tinn-giân bi̍t-gí piàn bô-bī
孤單來到
koo-tuann lâi-kàu
初戀的夜港邊
tshoo-luân ê iā káng-pinn
海風吹著心肝冷吱吱
hái-hong tshue tio̍h sim-kuann líng ki-ki
心愛的
sim-ài–ê
你到底佇佗位
lí tàu-té tī tó-uī
毋通予阮等你等規暝
m̄-thang hōo gún tán lí tán kui-mî
希望趕緊轉來阮身邊
hi-bāng kuánn-kín tńg-lâi gún sin-pinn
